Их зохиолч Дашдоржийн Нацагдоржийн мэндэлсний 120 жилийн ойн хүрээнд Төв аймгийн Засаг даргын Тамгын газар, “Чингис хаан” үндэсний музей хамтран “Миний хэнз хурга” хүүхдийн уран бүтээлийн уралдаан, аймгаас төрөн гарсан яруу найрагч, зохиолч, уншигчдын уулзалтыг аймгийн 27 суманд үе шаттайгаар зохион байгуулж байна. Хүүхдийн уран зохиол нь хүүхдийн хэл яриа, танин мэдэхүй, бүтээлч сэтгэлгээ, харилцааны ур чадвар, шүүмжлэлт сэтгэлгээг хөгжүүлж, монголын уламжлалт соёлын мэдлэгийг олгох чухал ач холбогдолтой.
Хүүхэд багачуудад унших соёлыг төлөвшүүлэх, уран зохиолын боловсролыг дэмжих, үндэсний өв соёл, утга зохиолын үнэт зүйлсийг сурталчлан таниулах, ирээдүйн зохиолч, яруу найрагчдыг нээн илрүүлэх зорилготой тус арга хэмжээнд эрдэмтэн, зохиолч Ш.Сүхбаатар, Д.Нацагдоржийн шагналт яруу найрагч Ж.Баяржаргал, хүүхдийн зохиолч Соёлын гавьяат зүтгэлтэн О.Сундуй зэрэг уран бүтээлчид оролцож, хүүхэд багачуудтай уулзан ярилцаж, уран зохиолын үнэ цэн, ном уншихын ач холбогдлын талаар ярилцаж байна.
Өнөөдрийн байдлаар Алтанбулаг, Баяндэлгэр, Эрдэнэ, Архуст, Баянжаргалан, Баян, Сэргэлэн, Батсүмбэр, Өндөрширээт, Бүрэн, Дэлгэрхаан, Эрдэнэсант суманд зохион байгуулан нийт 175 хүүхэд оролцоод байгаа юм. Сум тус бүрээс тэргүүн байр эзэлсэн хүүхдүүд ирэх долдугаар сарын 30-ны өдөр зохион байгуулах “Хаадын зам” төслийн хүрээнд болох “Миний нутаг” яруу найргийн өдөрлөгт оролцоно.
