BTS хамтлагийн гишүүн Жонгүгийн гэрийн гадаа удаа дараа очиж, хаалганы хонхыг нь 133 удаа дарсан Бразил улсын иргэн эмэгтэйд БНСУ-ын шүүхээс хорих ял оноожээ.
Сөүлийн дүүргийн шүүхээс түүнд нэг жилийн хорих ял оноосон боловч хоёр жилийн хугацаагаар түдгэлзүүлсэн байна. Мөн шүүхийн шийдвэр хүчин төгөлдөр хэвээр үлдвэл уг эмэгтэйг БНСУ-аас албадан гаргах төлөвтэй байгаа аж.
Шүүхийн баримтад дурдсанаар, эмэгтэй анх өнгөрсөн оны арванхоёрдугаар сарын 7-нд Жонгүгийн Сөүл дэх гэрт очиж, байшингийн гадаа удаан хугацаагаар хүлээж, өнжсөн төдийгүй хашаа давуулан эд зүйл шидэж, захидал болон гэрэл зургаа хаалганы завсраар шургуулж үлдээжээ.
Үүнээс хэдхэн хоногийн дараа тэр дахин ирж, гэрийн хонхыг нийт 133 удаа дарсан байна. Шүүх энэхүү үйлдлийг “хэт туйлширсан донтолтын шинжтэй” хэмээн тодорхойлжээ.
Эмэгтэй 2025 оны арванхоёрдугаар сарын 13-нд хүргэлтийн ажилтны араас даган орж, хажуугийн хаалгаар нэвтрэхийг оролдох үедээ баривчлагдсан байна. Түүнийг маргааш нь суллаж, дахин ойртохгүй байхыг анхааруулсан ч тэрээр энэхүү шаардлагыг үл тоомсорложээ.
Үүний дараа ч тэрбээр Жонгүгийн гэрт очсоор байсан тул цагдаагийн байгууллагаас түүнийг уг байршлаас 100 метрийн дотор ойртохыг хориглосон яаралтай хамгаалалтын захирамж гаргасан байна.
Гэсэн хэдий ч эмэгтэй мөрдөх үйлдлээ үргэлжлүүлсэн тул цагдаа нар энэ оны хоёрдугаар сард хэргийг прокурорт шилжүүлжээ. Шүүх хурлын үеэр нийтдээ 22 удаа Жонгүгийн гэрт очсон нь тогтоогдсон байна.
