Олон сая хүний хүсэн хүлээж буй “Grand Theft Auto VI” (GTA 6) тоглоомын урьдчилсан захиалга эхлэхийн өмнө “Rockstar Games” компани тус тоглоомын үнийг албан ёсоор танилцууллаа.
“GTA 6”-гийн стандарт хувилбар нь 79.99 ам.доллар, харин “Ultimate” хувилбар нь 99.99 ам.долларын үнэтэй байх аж. Илүү үнэтэй хувилбар нь тусгай автомашин, зэвсэг, хувцас болон тоглоомтой холбоотой нэмэлт контентуудтай байна.
Тоглоомыг дижитал болон “биет” хэлбэрээр гарах боловч “биет” хувилбар нь диск хэлбэрээр биш харин код бүхий хайрцаг байх ажээ.
Лхагва гараг /2026.06.24/-т үнийн талаар танилцуулах үеэрээ “Rockstar” компани олон тоглогчийн (multiplayer) болон онлайн горимтой байх эсэх талаар огт дурдаагүй бөгөөд уг тоглоом нь “цувралын түүхэн дэх хамгийн том, хамгийн бодит мэдрэмж төрүүлэх хөгжүүлэлттэй, ганц тоглогчийн (single-player) горимоос бүрдэнэ” гэдгийг онцолсон байна.
“GTA 6” тоглоомыг 11 дүгээр сарын 19-нд “PlayStation 5”, “PlayStation 5 Pro”, “Xbox Series X” болон “Xbox Series S” консолуудад зориулан худалдах ажээ. Урьдчилсан захиалга зургаадугаар сарын 26-ны 00:00 цагаас эхлэх бөгөөд “Amazon”, Walmart” зэрэг дэлхийн худалдааны сүлжээнүүдээр болон албан ёсны цахим дэлгүүрүүдээр дамжуулан авах боломжтой байна.
Дижитал хувилбарыг урьдчилан захиалсан хэрэглэгчид 11 дүгээр сарын 12-ноос тоглоомоо урьдчилан татаж эхлэх боломжтой. Харин код бүхий хайрцаг мөн энэ өдрөөс худалдаанд гарч, тоглоомын том хэмжээтэй файлыг урьдчилан суулгах боломжтой.
Тоглоомын үйл явдал АНУ-ын Вайс Сити хот болон Леонида муж улсад өрнөх бөгөөд гол дүрүүд болох Жэйсон, Люсиа нар бүтэлгүйтсэн дээрмийн дараа муж улс даяар өрнөх хуйвалдааны нэг хэсэг болж, урьд өмнөхөөсөө илүү бие биедээ найдахаас өөр аргагүй байдалд хүрэх гэнэ.
Мөн 11 дүгээр сарын 20-ноос өмнө урьдчилан захиалсан болон худалдан авсан бүх хэрэглэгч “Vintage Vice City Pack” нэртэй нэмэлт багцыг авах юм. Үүнд Вайс Ситигийн сонгодог хэв маягийг санагдуулах төрөл бүрийн тоглоомын эд зүйлс багтжээ. Түүнчлэн дижитал хувилбарыг урьдчилан захиалсан хэрэглэгчдэд “GTA+” үйлчилгээний нэг сарын эрхийг үнэ төлбөргүй олгох бөгөөд үүнийг “GTA Online” ертөнцийн нэмэлт боломжуудыг ашиглах хамгийн үр дүнтэй арга хэмээн компани тодорхойлсон байна.
