Титаникийн сүйрлээс үлдсэн 100 гаруй эд өлгийн зүйлийг дуудлагаар худалдаалах төлөвлөгөө АНУ-ын засгийн газрын эсэргүүцэлтэй тулгарчээ. Эдгээрийн дотор зорчигчдын хувийн эд агуурс, мөнгөн тэмдэгт, гал тогооны хэрэгсэл, чимэглэл зэрэг багтсан байна. Титаникийн эд зүйлсийг аврах онцгой эрхийг эзэмшдэг “RMS Titanic” компани анхандаа тэдгээрийг зөвхөн музей, үзэсгэлэнгийн зориулалтаар дэлгэхээр тохирсон байсан ч энэ удаад дуудлагаар худалдаалахыг хүсчээ.
АНУ-ын Үндэсний далай, агаар мандлын захиргаа ийм борлуулалт нь “RMS Titanic”-ийн хүлээсэн хууль ёсны үүргийг зөрчиж байна гэж үзсэн юм.
Титаникаас үлдсэн олон мянган эд зүйлийг 1987 оноос хойш далайгаас гаргаж ирсэн. Тэр дунд Титаникийн их биеийн хэсгүүд хүртэл байдаг. “RMS Titanic” тэдгээрийг үзэсгэлэнд тавьснаар мөнгө олдог бөгөөд энэ мөнгөөрөө ирээдүйн хайгуулын ажлаа санхүүжүүлдэг.
Хамгийн сүүлийн жишээнээс дурдвал, өнгөрсөн дөрөвдүгээр сард Титаникийн зорчигчийн өмсч явсан аврах хантааз 906 мянган ам.долларын үнэ хүрсэн. Мөн нэгдүгээр зэргийн зорчигч Исидор Штраусдын 18 каратын алтан цаг хоёр сая гаруй ам.доллараар зарагдсан билээ. Үүнээс гадна анхны хоолны цэс, аяллын тасалбар, Америкийн зорчигч Оскар Холверсоны бичсэн усанд автсан захидал, хийл зэрэг олон зүйл дуудлагаар худалдаалагджээ.
