Төрийн соёрхолт, “Камертон” хамтлагийн ахлагч, дуучин, продюсер Д.Болд хувийн зардлаараа цэцэрлэг барьж, нийслэлд хүлээлгэн өгөхөөр болсноо цахим хуудсаараа дамжуулан мэдээлсэн.
Тэрбээр “Урлагийн салбарт “Камертон” хамтлагтайгаа 31 жил, харин өөрийн бие даасан соло уран бүтээлээ хийгээд яг 21 жил болж байна. Энэ хугацаанд та бүхнийхээ хайр хүндэтгэлийг тайзан дээрээс дуу хуураараа дамжуулан авдаг байсан бол энэ удаад бидний ирээдүй болсон хүүхэд багачууддаа зориулан өөрийн зүгээс цэцэрлэг барьж, хотдоо бэлэглэхээр шийдлээ” хэмээн сэтгэгдлээ хуваалцсан юм. Тэрбээр уг ажлыг ном журмынх нь дагуу, хамгийн их хэрэгцээтэй байгаа дүүрэг, байршлыг сонгохын тулд нийслэлийн холбогдох албан тушаалтнуудтай уулзаж, ажлаа эхлүүлэхээр төлөвлөж байгаа аж. Мөн цаашид зөвхөн цэцэрлэгээр зогсохгүй залуучуудад урам зориг өгөх, нийгэмд эерэг хандлага түгээх олон ажлуудыг шат дараатай хийхээр төлөвлөж байгаа бөгөөд энэ бүх явцаа үзэгчидтэйгээ нээлттэй хуваалцаж байхаа илэрхийлсэн.
Тэгвэл түүний энэ санаачилгыг олон иргэн дэмжиж байгаагаа сошиалд болон биеэр уулзан илэрхийлж буй аж.
