“Оскар”-ын шагналд олон удаа нэр дэвшиж байсан жүжигчин Кэри Маллиган найруулагч Сара Поллигийн бүтээж буй “The Bell Jar” кинонд дүр бүтээхээр болсон талаар “Variety”-д мэдээлжээ.
Кэри Маллиган тус кинонд гол дүрийн баатар Эстер Гринвудын ээж Миссис Гринвудын дүрийг бүтээх бөгөөд Эстерийн дүрийг дуучин Билли Айлиш амилуулна. Энэ нь Билли Айлишийн бүрэн хэмжээний уран сайхны кинонд тоглож буй анхны дүр юм.
“The Bell Jar” нь Америкийн нэрт зохиолч Сильвиа Платын 1963 онд хэвлүүлсэн, хагас намтарчилсан алдарт романаас сэдэвлэсэн бүтээл юм. Зохиолд Нью-Йоркт дадлага хийж буй авьяаслаг оюутан Эстер Гринвуд нийгмийн дарамт, сэтгэцийн эрүүл мэндийн бэрхшээлтэй хэрхэн тэмцэж буйг өгүүлдэг.
Киног “Оскар”-ын шагналт найруулагч, зохиолч Сара Полли найруулж, зохиолыг нь өөрөө бичжээ. Төслийг “Focus Features” АНУ-д түгээх бөгөөд “Joy Coalition”, “Plan B Entertainment”, “StudioCanal” хамтран продюсерлож байна.
Кэри Маллиган хамгийн сүүлд “The Ballad of Wallis Island” кинонд тоглосон бөгөөд мөн “Wildwood” хүүхэлдэйн кинонд дуу оруулахаар ажиллаж байгаа юм. Харин Билли Айлишийн хувьд энэ төсөл нь түүний дэлгэцийн жүжигчний карьерын хамгийн том алхам болж байна.
