Бейонсегийн аав бөгөөд “Destiny’s Child” хамтлагийн менежер асан Мэтью Ноулз удахгүй тус хамтлагийн алдарт дуунуудын шинэ ремикс хувилбарууд сонсогчдын хүртээл болно гэж мэдэгджээ.
МэтьюНоулзын хэлснээр эдгээр ремикс нь хамтлагийн сонгодог хит бүтээлүүдийг шинэ өнгө төрхөөр хүргэх зорилготой бөгөөд орчин үеийн хөгжмийн урсгалд нийцүүлэн шинэчлэн найруулсан байна.
Тэрбээр мөн төслийн талаар “Шүтэн бишрэгчид үнэхээр баярлах болно. Үүнийг удахгүй сонсох боломжтой болно” гэж ярьжээ.
Одоогоор ямар дуунуудыг шинэчлэн гаргаж, хэзээ албан ёсоор цацах талаар дэлгэрэнгүй мэдээлэл хараахан гараагүй байна.
“Destiny’s Child” нь Бейонсе, Келли Роуланд, Мишель Уильямс нараас бүрдсэн бөгөөд “Say My Name,” “Survivor,” “Bootylicious” зэрэг дэлхий даяар алдаршсан хит дуунуудаараа R&B урсгалын хамгийн амжилттай охидын хамтлагуудын нэг байсан юм.
