“Нэг бүс, нэг зам” санаачилгын дагуу улс орнуудын өсвөр үе, залуучуудын харилцан ойлголцол, нөхөрлөлийг бэхжүүлэх зорилготой “Торгоны замын ирээдүй” соёлын солилцооны үйл ажиллагаа БНХАУ-ын Бээжин, Сямень хотод энэ сарын 19-26-нд боллоо.
Соёл, спорт, аялал жуулчлал, залуучуудын яам болон БНХАУ-ын Сун Чин Лин сангийн хооронд байгуулсан “Залуучуудын салбарт хамтран ажиллах тухай” харилцан ойлголцлын санамж бичгийн хүрээнд хэрэгжүүлсэн үйл ажиллагаанд Армени, Гамби, Испани, Ливи, Малайз, Монгол, Оман, Оросын Холбооны Улс, Пакистан, Саудын Араб, Словак, Словени, Тайланд, Туркменистан, Узбекистан, Филиппин улсын 16 орны 80 гаруй залуучууд оролцож улс орныхоо түүх, соёл, ёс заншлыг танилцуулан, харилцан туршлага солилцлоо.
Хөтөлбөрийн хүрээнд оролцогчид БНХАУ-ын түүх, соёлын дурсгалт газрууд, боловсролын байгууллага, техник, технологийн хөгжлийн төвүүдтэй танилцаж, олон улсын залуучуудын хамтын ажиллагаа, соёлын олон талт байдал, оролцоо, манлайллын талаар мэдлэг, туршлага хуваалцсан байна. Монгол залуучууд үндэсний өв соёл, уламжлал, ёс заншил, залуучуудын байгууллагын үйл ажиллагааг бусад орны төлөөлөгчдөд танилцуулж, цаашдын хамтын ажиллагааны шинэ харилцаа холбоог бий болгов.
Цаашид БНХАУ-ын Сун Чин Лин сантай байгуулсан харилцан ойлголцлын санамж бичгийн хүрээнд залуучуудын хөгжил, оролцоог дэмжих төсөл, хөтөлбөрүүдийг хамтран хэрэгжүүлж, залуучуудын салбарын мэргэжилтэн, албан хаагчдын мэдлэг, ур чадварыг дээшлүүлэх, алсалсан бүс нутагт амьдарч буй залуучууд болон зорилтот бүлгийн залуучуудын хөгжлийг дэмжих, залуу мэргэжилтэн, шинжээчдийг чадавхжуулах чиглэлээр хамтын ажиллагаагаа өргөжүүлэхээр төлөвлөж байгааг ССАЖЗЯ-наас мэдээлэв.
