Холливудын нэрт жүжигчин Энтони Хопкинс 88 насандаа хөгжмийн зохиолчийн хувиар анхны цомгоо гаргаж, олон жилийн турш нууцхан үргэлжлүүлсэн хөгжмийн сонирхлоо олон нийтэд дэлгэлээ. Түүний “Life Is a Dream” нэртэй цомгийг “Decca Records” хэвлэн гаргасан бөгөөд цомгийн бүтээлүүдэд Энтони Хопкинсын кино урлагийн туршлага, Уэльс үндэс угсаа, хувийн дурсамжууд нь хүчтэй туссан байна.
Цомгийн хөгжмийг Густаво Дудамель удирдаж, “Philharmonia Orchestra” болон “Bach Choir” зэрэг уран бүтээлчид оролцжээ. Мөн Аргентины төгөлдөр хуурч Серхио Тиемпо, Венесуэлийн виолончелч Грегорио Нието нар гоцлол хөгжимчдөөр ажилласан байна.
“Life Is a Dream” цомгийн нээлтийн “Fanfare and March” бүтээл нь эрч хүчтэй, сүрлэг өнгө аястай бол “Two Pieces for Orchestra” нь Арменийн хөгжмийн зохиолч Арам Хачатуряны бүтээлүүдийн нөлөөг санагдуулам аж.
Энтони Хопкинс мөн төрж өссөн нутаг Уэльсийнхээ соёл, уламжлалыг “My Fatherland” бүтээлээрээ хөгжимд шингээжээ. Уг бүтээлд Уэльсийн уламжлалт зургаан аялгуу багтсан бөгөөд дөрвийг нь Уэльс хэлээр дуулсан байна.
Цомогт жүжигчний хувийн дурсамж, гэр бүлийнхэндээ зориулсан бүтээлүүд ч бий. Тухайлбал, “1947: Suite for Orchestra” нь Энтони Хопкинсын бага нас, төрсөн нутгийнх нь гудамж, уулс болон аавтайгаа хамт кино театрт очиж байсан дурсамжийг хөгжимөөр илэрхийлсэн байна. Харин “Stella Aria”, “Farewell My Love” бүтээлүүдийг эхнэртээ, “Tara” бүтээлийг зээ охиндоо зориулжээ.
Энтони Хопкинс дөрвөн настайгаасаа төгөлдөр хуур тоглож эхэлсэн бөгөөд жүжигчний карьерынхаа зэрэгцээ хөгжмийн зохиол бичих сонирхлоо олон арван жилийн турш хадгалсан байна. Түүний бүтээлүүдэд киноны хөгжимд ойр, уянгалаг, сонсоход хялбар аялгуу давамгайлдаг.
“The Guardian” сэтгүүлд нийтлэгдсэн шүүмжид “Life Is a Dream” нь хөгжмийн шинэ чиглэл эрэлхийлсэн цомгоос илүү сэтгэлээсээ бүтээсэн, уянгалаг аялгуу болон уламжлалт хөгжмийн зохиомжийг эрхэмлэсэн бүтээл болжээ” хэмээн үнэлжээ.
Энтони Хопкинсийн хувьд энэ цомог нь зөвхөн жүжигчнийхээ алдартай нэрийг хөгжмийн ертөнцөд авчирсан бүтээл бус, харин бага нас, төрөлх нутаг, гэр бүл болон амьдралынхаа дурсамжийг хөгжмөөр өгүүлсэн хувийн уран бүтээл болж байна.
