Английн жүжигчин Том Фелтон өнөөдөр 39 нас хүрч байна. Тэрбээр 1987 оны энэ өдөр буюу есдүгээр сарын 22-нд Английн Суррей мужийн Эпсом хотод Томас Эндрю Фелтон нэрээр төржээ. Тэрбээр бага наснаасаа урлагийн салбарт хөл тавьж, улмаар дэлхийн хамгийн алдартай кино франчайзуудын нэг болох “Harry Potter” цувралын Драко Малфойн дүрээр олон улсын хэмжээнд танигдсан жүжигчин юм.
Фелтон жүжигчний карьераа найман настайдаа эхлүүлжээ. Гэр бүлийнх нь жүжигчин найз түүний тайзны авьяасыг анзаарч, жүжигчний агенттай уулзахыг санал болгосноор мэргэжлийн урлагийн ертөнцөд орсон байна. Улмаар 400 гаруй хүүхэд оролцсон сонгон шалгаруулалтад амжилттай орж, олон улсын сурталчилгаанд тоглон, бага насандаа гадаадад ажиллаж эхэлжээ.
Жүжиглэхээс гадна Фелтон багаасаа хөгжимд дуртай байв. Тэрээр долоон настайгаасаа сүмийн найрал дуунд дуулж, сургуулийнхаа хэд хэдэн найрал дуунд оролцож байсан бөгөөд хожим өөрийн хөгжмийн уран бүтээлүүдийг ч гаргажээ.
Том Фелтоны карьерын хамгийн том эргэлт 2001 онд гарсан. Тэр жил “Harry Potter and the Sorcerer’s Stone” кинонд Драко Малфойн дүрийг бүтээж, дэлхийн үзэгчдийн танил болсон юм. Түүний бүтээсэн Драко нь Харри Поттерын сургуулийн өрсөлдөгч, Слизериний сурагч бөгөөд бардам, зальтай, заримдаа харгис зан чанараараа ялгардаг дүр байлаа.
Фелтон Драко Малфойн дүрийг нийт найман “Harry Potter” кинонд бүтээж, франчайзын арван жилийн зураг авалтын турш дүртэйгээ хамт өссөн жүжигчдийн нэг болсон юм. Түүний байгалиас заяасан үсний өнгө харьцангуй бараан шаргал боловч кинонд Дракогийн дүр төрхийг гаргахын тулд үсээ платинум шар өнгөөр будах шаардлагатай байжээ.
Сонирхолтой нь, Фелтон бодит амьдрал дээр Дракогоос тэс өөр зан чанартай гэдгээрээ шүтэн бишрэгчдийн анхаарлыг татдаг. Түүний тоглосон дүр үзэгчдэд сөрөг сэтгэгдэл төрүүлдэг байсан ч жүжигчний өөрийнх нь дүрийн талаарх тайлбар, хошин зан чанар нь олон жилийн турш “Harry Potter”-ын фенүүдийн сонирхлыг хадгалсаар ирсэн.
“Harry Potter” цувралын зураг авалтын үеэр болон дараа Фелтон өөр төрлийн дүрүүдийг туршиж эхэлсэн. Тэрбээр “The Disappeared”, “Night Wolf”, “The Apparition” зэрэг кинонд тоглож, аймшгийн болон триллер төрлийн бүтээлүүдээр өөрийгөө сорьжээ.
2011 онд тэрбээр “Rise of the Planet of the Apes” кинонд Додж Лэндоны дүрийг бүтээсэн нь “Harry Potter”-оос хойших анхаарал татсан уран бүтээлүүдийн нэг байв. Мөн “From the Rough”, “In Secret” зэрэг кинонд тоглож, өсвөр насны алдартай дүрээсээ салж, илүү насанд хүрсэн жүжигчний карьер руу шилжихийг зорьсон байна.
Дараагийн жилүүдэд Фелтон киноноос гадна телевизийн салбарт ажиллаж, “The Flash”, “Origin” зэрэг бүтээлд дүр бүтээжээ. Мөн “The Forgotten Battle”, “A Babysitter’s Guide to Monster Hunting”, “Braking for Whales”, “Save the Cinema”, “Burial” зэрэг кинонд тоглосон байна.
Том Фелтон зөвхөн жүжигчин төдийгүй хөгжимд дуртай уран бүтээлч юм. Тэрбээр 2008 оноос “Feltbeats” нэрээр хөгжмийн бүтээлүүдээ нийтэлж эхэлсэн бөгөөд “Time Well Spent”, “All I Need”, “In Good Hands” зэрэг бүтээлүүдээ гаргаж байжээ.
Мөн 2010 онд найзуудынхаа хамт “Six String Productions” нэртэй хөгжмийн продакшн байгуулж, томоохон дуу бичлэгийн компаниудад анзаарагдаагүй залуу уран бүтээлчдийг дэмжих чиглэлээр ажилласан байна.
IMDb-ийн мэдээллээр Фелтон 2026 оны байдлаар жүжигчин, продюсер, найруулагчийн чиглэлээр ажиллаж байгаа бөгөөд кино, телевизийн олон бүтээлд оролцжээ. Түүний сүүлийн үеийн бүтээлүүдийн дунд “Fackham Hall”, “They Will Kill You”, “Gandhi”, “Altered” зэрэг кино, телевизийн төслүүд багтаж байна. Мөн “As Deep as the Grave” бүтээл нь 2026 онд пост-продакшны шатанд бүртгэгдсэн байна.
