Өнөөдөр Монголын театрын урлагийн залуу үеийн төлөөлөл, “Про” театрын үүсгэн байгуулагчдын нэг, жүжигчин З.Булганы төрсөн өдөр.
З.Булган ОХУ-ын Санкт-Петербург хотын Театр урлагийн академид хүүхэлдэйн театрын жүжигчин мэргэжлээр суралцаж, эх орондоо ирснийхээ дараа хамтран суралцсан нэг ангийн нөхөдтэйгөө өөрсдийн театрыг байгуулсан нь өнөөдрийн “Про” театр.
Монголын нэрт жүжигчин Ж.Дорлигжавын зээ хүү З.Булганд өвөөгийнх нь уран бүтээл, мэргэжлийн замнал жүжигчин мэргэжлийг сонгоход нь нөлөөлжээ.
З.Булганыг театрын урлагт шимтэгсэд “Про” театрын бүтээл, Францын алдарт зохиолч Виктор Хюгогийн “Инээмтгий хүн” романаас сэдэвлэсэн ижил нэрт визуал драмын жүжгийн Хомо, Эрнст Теодор Амадей Гофманий “Цөмөөхэй ба хулганын хаан” үлгэрээс сэдэвлэсэн “Цөмөгч цэрэг ба хулганы хаан” хүүхдийн жүжгийн Щелкунчик, Александр Дюмагийн алдарт зохиолоос сэдэвлэсэн “Шадар гурван цэрэг” физикл драмын жүжгийн Портос, Александр Вампиловын алдарт “Нугасны ан” жүжгийн зохиолоос сэдэвлэсэн “Сүүлчийн бороо” мета драмын жүжгийн Зилов зэрэг дүрээр “дотно танилцсан” гэхэд хилсдэхгүй.
Харин тун удахгүй тэрбээр дэлгэцийн уран бүтээлээр үзэгчидтэй уулзана. Тодруулбал, тэрбээр “Соёл-Эрдэнэ” хамтлагийн түүхийг өгүүлэх уран сайхны кинонд тус хамтлагийн гишүүн, хөгжимчин, хөгжмийн зохиолч З.Зундарийн дүрийг бүтээсэн юм.
