Найр наадмын налгар зуны өдрүүдээр Өвархангай аймгийн Өндөр Хясааны аманд өндөр уулын бүсийн нүүдэлчин ард түмний амьжиргааны гол эх үүсвэр болсон сарлагийн амьдралын онцлог ашиг шим, үр өгөөжийг олон нийтэд таниулан харуулсан сарлагийн наадмыг амжилттай зохион байгуулсан байна.
Уг наадам нь жуулчдыг анхаарал, сонирхлыг ихээхэн татдаг сайтар зохион байгуулагддаг манай улсын томоохон арга хэмжээнүүдийн нэг юм. Энэхүү баярт нутгийн иргэд идэвхтэй оролцож нүүдлийн соёлыг хүрэлцэн ирсэн 300 гаруй жуулчдад таниулахын сацуу урлагийн тоглолт, сарлагийн уралдаан, сарлагийн поло зэрэг олон сонирхолтой арга хэмжээг өргөн дэлгэр зохион явууллаа. Тэр дундаа сарлагийн поло олон жуулчид, үзэгчдийн сонирхолыг татаж чадсан төдийгүй маш өрсөлдөөнтэй тэмцээн болсноороо ихээхэн онцлог байсан юм..