Өмнөд Солонгосын BTS хамтлагийн ахлагч, реппер RM буюу Ким Нам Жүн өнөөдөр 32 нас хүрч байна. Тэрбээр 1994 оны энэ өдөр буюу есдүгээр сарын 12-нд төржээ.
Ким Намжүн бага наснаасаа хөгжим, тэр дундаа хип хоп урлагийг сонирхож, “Runch Randa” нэрээр рэп уран бүтээл туурвиж эхэлжээ. Улмаар “Big Hit Entertainment”-д элсэж, 2013 онд BTS хамтлагийн гишүүнээр албан ёсны дебют хийсэн юм.
RM нь хамтлагийн ахлагч, гол репперийн үүргийг гүйцэтгэхийн зэрэгцээ дууны үг, хөгжмийн бүтээлд идэвхтэй оролцдог уран бүтээлч. Түүний уран бүтээлчийн онцлог нь рэпийн ур чадвараас гадна дууны үгэндээ өөрийн үзэл бодол, нийгэм, залуу үеийн асуудлыг тусгадагт оршдог.
BTS-ийн уран бүтээлийн хүрээнд RM-ийн оролцсон олон дуу дэлхий даяар амжилт олсон. Тус хамтлагийн “Dynamite”, “Butter”, “Life Goes On” зэрэг хит дууны уран бүтээлийн үеэр RM-ийн дүр төрх, рэп хэсэг нь онцгой анхаарал татаж байв.
Тэрбээр хамтлагийн уран бүтээлээс гадна соло уран бүтээлээ тууштай хөгжүүлж ирсэн. RM “RM” (2015), “mono.” (2018), “Indigo” (2022) зэрэг бие даасан бүтээлүүдээрээ өөрийн хөгжмийн ертөнцийг харуулсан юм.
Ялангуяа “Indigo” цомог нь түүний уран бүтээлчийн хувьд илүү хувийн, гүнзгий өнгө аясыг илэрхийлсэн бүтээл болсон бөгөөд олон улсын сонсогчдын анхаарлыг татсан.
Өдгөө RM нь зөвхөн BTS-ийн ахлагч төдийгүй к-попын дэлхийн хэмжээний нөлөө бүхий уран бүтээлчдийн нэг хэмээн үнэлэгддэг. Түүний төрсөн өдөр жил бүр BTS-ийн шүтэн бишрэгчид болох ARMY-ийн хувьд онцгой өдөр болдог.
