Монголын уран зургийн галерей нь жил бүр “Байнгын үзэсгэлэн”-г зохион байгуулж, сан хөмрөгт хадгалагдаж буй сор бүтээлүүдээ үзэгч, олон нийтэд толилуулдаг.
2026 оны “Байнгын үзэсгэлэн”-гээр нийт зургаан үзэсгэлэнгийн танхимд зургаан сэдэвчилсэн үзэсгэлэнг дэглэн хүргэж, та бүхэнд цувралаар танилцуулж байна.
XX зууны дунд үеэс өнөөг хүртэлх Монголын уран баримлын хөгжлийн замнал, уран сайхны хэлбэр, сэтгэлгээний хувьслыг үйл хөдлөл ба орон зайн илэрхийллээр дамжуулан дэлгэн үзүүлж байна.
Үзэсгэлэнд дэлгэгдсэн бүтээлүүдээр монгол хүний бие бялдар, хөдөлгөөн, зан төрх, дотоод сэтгэл, ахуй амьдрал, уламжлалт соёлын дүрслэл төдийгүй тухайн цаг үеийн нийгмийн үзэл санаа, хөдөлмөр, боловсрол, спорт, зан заншил зэрэг олон талт сэдвийг уран баримлын хэлээр хэрхэн илэрхийлж ирснийг тольдох боломжтой. Монголын орчин үеийн уран баримлын сургуулийг төлөвшүүлэхэд үнэтэй хувь нэмэр оруулсан С.Чоймбол, Н.Жамбаа нарын нэрт уран бүтээлчдийн бүтээл нь энэ хөгжлийн чухал үе шатыг төлөөлнө.
С.Чоймболын “Бөхийн гараа”, Д.Тамсагдоржийн “Хаалгач” зэрэг бүтээлд хөдөлгөөний оргил агшин, түр зуурын үйл явдлыг орон зайд тогтоон барих уран сайхны шийдэл тодорхой харагддаг бол Н.Батбаярын “Дайчин”, С.Доржпаламын “Шантрашгүй уншигч” бүтээлүүдэд хүний сэтгэл хөдлөл, дотоод эрчмийг биеийн байрлал, дохио зангаа, эзлэхүүн, хэмнэлээр илэрхийлсэн олон талт арга барил ажиглагдана.
Мөн монгол ахуй, уламжлалт соёлын онцлогийг харуулсан дүр дүрслэл үзэсгэлэнгийн чухал хэсгийг бүрдүүлж буй юм. Тухайлбал, Н.Жамбаагийн “Айраг”, С.Дамдинжавын “Аавын малгай” зэрэг бүтээлд нүүдэлчдийн ахуй, зан заншлыг ахуйн эд өлгийн зүйлсийн нарийн дүрслэлтэй хослуулан илэрхийлсэн байх бол Л.Дашдэлэгийн “Түрлэг”, Т.Энхтайваны “Бөө” зэрэг бүтээл уламжлалт дүрслэлийн хүрээнээс тэлж хэлбэр, гадаргуу, орон зайн харилцан хамаарлыг илүү чөлөөтэй эрэлхийлсэн баялаг шийдлүүдийг ашиглажээ.
Хүрэл, гипс, зэс хөөмөл, гууль, цаасан шуумал зэрэг олон төрлийн материал, техникээр бүтээсэн эдгээр бүтээл нь “хөдөлгөөн”-ийг биет хэлбэрээр илэрхийлэхийн зэрэгцээ сэтгэлгээний цар хүрээ, уран сайхны хязгааргүй боломжийг таниулж байна.
