Өмнөд Солонгосын дуучин, жүжигчин IU 16 жилийн турш дотно нөхөрлөсөн жүжигчин Ю Ин Надаа зориулан шинэ дуу гаргажээ.
Тус дуу нь IU-ийн есдүгээр сарын 10-нд гаргасан “From This Star” дижитал синглийн багцад багтсан “Dear My Crazy Soulmate” нэртэй бүтээл юм. IU өөрөө дууны үгийг бичсэн бөгөөд албан ёсны танилцуулгад “For Yoo In-na” хэмээн тэмдэглэсэн байна.
IU есдүгээр сарын 15-нд Ю Ин Натай олон жилийн турш хамт авахуулсан гэрэл зургуудыг нэгтгэсэн бичлэгээ инстаграм хуудсандаа нийтэлж, “Dear my crazy soulmate”, “Sure YOO IN NA we best soulmate” хэмээн бичжээ.
“Dear My Crazy Soulmate” дууны үгэнд IU найзынхаа зан чанарыг байгаагаар нь хүлээн зөвшөөрч, ирээдүйд ч хамтдаа нөхөрлөж, хөгширсөн хойноо хүртэл дурсамжаа хуваалцахыг хүсдэг тухайгаа өгүүлсэн байна. Тэр дундаа хамтдаа “хачин эмээ нар” болохыг мөрөөддөг гэсэн санааг дууныхаа төгсгөлд илэрхийлжээ.
IU, Ю Ин На нар 2010 онд SBS телевизийн “Heroes” нэвтрүүлэгт хамт оролцох үеэрээ танилцсан бөгөөд түүнээс хойш дотно найзууд болсон юм. Мөн тэд 2013 онд “You Are the Best!” олон ангит кинонд хамтран тоглож байжээ.
View this post on Instagram
