Монгол Улсын төр, нийгэм, цэргийн нэрт зүтгэлтэн, БНМАУ-ын баатар, Хөдөлмөрийн баатар, маршал Юмжаагийн Цэдэнбалын мэндэлсний 110 жилийн ойд зориулан бүтээсэн “БНМАУ-ын баатар, маршал Ю.Цэдэнбал” баримтат киноны нээлт есдүгээр сарын 16-нд Увс аймгийн 18 сумын Соёлын төв болон “Ойрад” театрт нэгэн зэрэг боллоо.
Баримтат кинонд Ю.Цэдэнбалын бага, идэр, өтөл нас, боловсрол, ажил, амьдралын замналын талаар өгүүлэхийн зэрэгцээ тухайн үеийн Монгол Улсын хөгжилд оруулсан хувь нэмрийг түүхэн үйл явдал, баримтад тулгуурлан харуулжээ.
Киноны нээлтийг орон нутгийн иргэд, төрийн албан хаагчид, ерөнхий боловсролын сургуулийн сурагчид зэрэг 5000 гаруй хүн үзэж, маршал Ю.Цэдэнбалын амьдрал, ажил үйлс, Монголын төр, нийгмийн хөгжилд оруулсан хувь нэмрийг түүхэн баримтаар харуулсан бүтээлтэй танилцлаа.
Мөн Улаангом сумын төв талбайд байрладаг маршал Ю.Цэдэнбалын хөшөөнд цэцэг өргөж хүндэтгэл илэрхийллээ. Ойн хөтөлбөрийн дагуу Давст суман дахь хөшөөнд нь цэцэг өргөх, Тун мэндийн өвөлжөөг тохижуулах, үндэсний бөхийн барилдаан, хурдан морины уралдаан зохион байгуулж байна.
Ю.Цэдэнбалын мэндэлсний 110 жилийн ойд оролцохоор ОХУ-ын Красноярск мужийн Курагино тойргийн “Хил хязгааргүй найрамдал” төслийн удирдагч Родина Светлана Асхатовна, “Курагино” музейн захирал Катина Елена Михайловна тэргүүтэй зочид Увс аймагт хүрэлцэн иржээ.
“Хил хязгааргүй найрамдал” төслийг 2013 оноос хэрэгжүүлж, Увс аймгийн Улаангом сум, ОХУ-ын Красноярск мужийн Курагино тойргийн хооронд соёлын солилцоог хөгжүүлэх чиглэлээр хамтран ажиллаж байна.
Мөн өнөөдөр Ю.Цэдэнбалын нэрэмжит Улаангом сумын ерөнхий боловсролын нэгдүгээр сургуулийн 100 жилийн ойн баяр болж байна.
