Жүжигчин Шэрон Стоун карьерынхаа эхэн үед зураг авалтын үеэр өмссөн дотуур хувцас, хөхний даруулгыг нь өөрийн зөвшөөрөлгүйгээр худалдахаар дэлгэсэн байхыг харсныхаа дараа кино, телевизийн бүтээл бүрийн гэрээндээ өмссөн хувцсаа өөртөө үлдээх нөхцөл оруулдаг болсон тухайгаа ярьжээ.
Стоун энэ тухай “Variety” сэтгүүлд өгсөн ярилцлагадаа дурдсан байна. Түүний хэлснээр энэ явдал 1980-аад оны эхэн үеийн телевизийн цувралын зураг авалтын үеэр болсон бөгөөд зураг авалтын талбайгаас гарч явахдаа өөрийн өмсөж байсан дотуур хувцас, хөхний даруулгуудыг эвхдэг хуванцар ширээн дээр худалдахаар дэлгэсэн байхыг харжээ. Тэр мөчийг Стоун эмэгтэй хүний хувьд доромжлол байсан хэмээн тодорхойлсон байна.
Үүний дараа тэрбээр менежертэйгээ ярилцаж, цаашдын гэрээнүүддээ кино, телевизийн бүтээлд өмссөн хувцсаа өөртөө үлдээх эрхийг тусгуулахыг хүссэн аж. Менежер нь эхэндээ үүнийг ер бусын хүсэлт гэж үзсэн ч Стоун шийдвэрээсээ буцаагүй байна. Тэрбээр хувцсаа өөртөө хадгалах, хандивлах эсвэл хүсвэл устгах эрхтэй байхыг хүссэн гэжээ.
Стоуны хэлснээр тухайн үед эмэгтэй жүжигчид эрэгтэй жүжигчидтэй харьцуулахад хангалттай цалин авч чаддаггүй байсан нь мөн хувцас, эд зүйлээ өөртөө үлдээх шийдвэр гаргахад нөлөөлсөн байна. Тэрбээр гэрээгээ боловсруулах талаар жүжигчин Кэрри Фишерээс зөвлөгөө авч байсан бөгөөд Фишер өөрийн ээж, жүжигчин Дебби Рейнолдсоос энэ талаар суралцсан байжээ.
Энэ нөхцөл Стоунд хожим 1995 оны “Casino” кинонд өмссөн хувцаснуудаа хадгалж үлдэх боломж олгосон байна. Тэрбээр тус кинонд Жинжер МакКеннагийн дүрийг бүтээсэн бөгөөд уг киноны хувцаснуудынхаа дундаас хуримын даашинз болон гутлаа онцгойлон дурсжээ.
Стоун мөн жүжигчдэд, ялангуяа эмэгтэй уран бүтээлчдэд гэрээгээ сайтар уншиж, өөрсдийн эрх ашгийг хамгаалах нөхцөлүүдийг тусгах хэрэгтэй гэж зөвлөсөн байна.
