Монголын театрын урлагийг дэлхийд сурталчилж буй “Тамгагүй төр” буюу “Монгол хаан” жүжгийг есдүгээр сарын 19, 20-ны өдрүүдэд ОХУ-ын алдарт Марийнский театрын Приморскийн тайзнаа тоглолоо. Тодруулбал, Олон улсын Номхон далайн театрын IV наадмыг “Монгол хаан” жүжиг албан ёсоор нээсэн нь тэр юм. Наадмын хөтөлбөрт дэлхийн 13 орны театрын төрөл жанр харилцан адилгүй 13 жүжиг багтжээ. Үүнд, Армен, Беларусь, Бразил, Энэтхэг, Казахстан, Хятад, Колумб, Малайз, Мексик, Монгол, ОХУ, Франц болон Өмнөд Африкийн Бүгд Найрамдах Улс зэрэг улсын театрууд уран бүтээлээ хүргэх аж.
Уг наадмын ерөнхий зохион байгуулагчаар А.П.Чеховын нэрэмжит олон улсын театрын наадам ажиллаж байна. Анх 1992 онд зохион байгуулагдсан уг наадам Орос улсад зохион байгуулагддаг анхны бөгөөд хамгийн том олон улсын театрын арга хэмжээ, дэлхийн хамгийн алдартай театрын форумуудын нэг юм. Уг наадам байгуулагдсанаасаа хойш гучин жилийн хугацаанд Москва болон Оросын бусад хотуудад 54 орны 600 гаруй шилдэг бүтээлийг толилуулж байжээ.
