Супермодель Синди Кроуфорд, бизнес эрхлэгч Рэнд Гербер нарын ууган хүү, загвар өмсөгч Пресли Гербер 27 насандаа нас баржээ.
Лос-Анжелесийн тойргийн Эрүүл мэндийн шинжээчийн бүртгэлд мэдээлснээр Пресли Гербер есдүгээр сарын 20-ны ням гарагт сэргээн засах эмчилгээний байгууллагад нас барсан байна. Түүний нас барсан шалтгааныг одоогоор нийтэд мэдээлээгүй байна.
Гэр бүлийн төлөөлөгч Алли Женкинсийн мэдээлснээр Кроуфорд, Рэнд Гербер болон тэдний гэр бүл энэ хүнд хэцүү цаг үед хувийн орон зайг нь хүндэтгэхийг хүссэн байна.
Пресли Гербер ээж болон дүү Кайя Герберийнхээ адил загварын салбарт карьераа эхлүүлээд байсан юм. Тэрбээр 16 настайдаа Италийн “Moschino” брэндийн загварын шоунд тайзнаа анх гарч, улмаар “Calvin Klein”, “Dolce & Gabbana”, “Burberry”, “Bottega Veneta” зэрэг олон алдартай брэндтэй хамтран ажиллажээ.
Тэрбээр 2018 онд ээж Синди Кроуфордтой хамт “Pepsi”-гийн “Super Bowl”-ын сурталчилгаанд тоглосноор олны анхаарлыг татаж байв.
Сүүлийн жилүүдэд Пресли сэтгэцийн эрүүл мэнд болон бодисын хэрэглээтэй холбоотой өөрийн асуудлынхаа талаар нээлттэй ярьж байсан. Тэрбээр 2023 онд “Studio 22” подкастад оролцохдоо сэтгэл гутрал болон сэтгэцийн эрүүл мэндийн асуудалтай тэмцэж байсан тухайгаа хуваалцаж байсан.
Мөн 2025 онд тэрбээр “Mental Health Mondays” нэртэй сошиал медиа цуврал эхлүүлж, хүмүүсийн тэр бүр ил тод ярьдаггүй сэтгэцийн эрүүл мэндийн асуудлын талаар нээлттэй яриа өрнүүлэхийг хичээж байв.
