Италийн тансаг зэрэглэлийн загварын ордон “Gucci” уран бүтээл эрхэлсэн захирал Демнагийн бүтээсэн 2027 оны хавар, зуны шинэ коллекцоо өчигдөр /2026..09.25/ Миланд танилцууллаа.
“Gucci”-гийн мэдээлснээр “The Store Show” нэртэй загварын шоу Италийн цагаар 14:00 цагт болжээ. Энэ нь Демнагийн “Gucci”-д зориулан бүтээсэн хоёр дахь тайзны коллекц бөгөөд Миланы загварын долоо хоногийн онцлох үзүүлбэрүүдийн нэг болж байна.
Демна “Gucci”-гийн уран бүтээл эрхэлсэн кахирлын хувиар анхны бүрэн хэмжээний тайзны коллекцоо 2026 оны хоёрдугаар сард танилцуулсан. Харин энэ удаагийн бүтээлээрээ тэрбээр загварын ордны шинэ дүр төрхийг улам тодорхой болгохоор зорьж буйгаа өмнө нь ярьж байв.
Дизайнер шинэ коллекцоо бүтээхдээ “Gucci”-гийн олон жилийн өв уламжлалыг өөрийн хэв маягтай нэгтгэхийн зэрэгцээ брэндийг хараад шууд танигдах шинэ силуэт бий болгоход анхаарсан байна. Тэрбээр есдүгээр сарын коллекцдоо “Gucci”-гийн өөрийн гэсэн тодорхой хэлбэр төрхийг харуулахыг хүсэж байгаагаа “Vogue”-д өгсөн ярилцлагадаа дурджээ.
Демна шинэ “Gucci”-г тодорхойлохдоо эрс шийдэмгий, өөртөө итгэлтэй, дэгжин, зоримог, тансаг, өвөрмөц, дур булаам зэрэг шинж чанарыг гол чиглэлээ болгосон байна. Түүний хувьд хувцасны хэлбэр, харьцаа, тэр дундаа хэдхэн сантиметрийн ялгаа хүртэл шинэ силуэтийг тодорхойлоход чухал ач холбогдолтой аж.
2026 оны есдүгээр сарын 22-28-нд үргэлжилж буй Миланы загварын долоо хоногийн хүрээнд “Gucci”-гээс гадна “Prada”, “Fendi”, “Bottega Veneta”, “Moschino” зэрэг Италийн томоохон загварын орднууд шинэ коллекцоо танилцуулж байна.
