Баянхонгор аймгийн Хөгжимт драмын театрын хамт олон 50 жилийн түүхт ойгоо угтан үзэгчдийн танхим, тайз гэрэлтүүлэгтээ иж бүрэн засвар шинэчлэлийг хийжээ.
Театрын үзвэрийн танхим дахь сандлын түвшин болон тайзны өндрийн харьцаа нь хоорондоо уялдсан, хүний харааны төв цэгт тэгш хэмтэй байх стандартад нийцүүлэхээр хуучин намхан байсан үзэгчдийн их танхимын шалыг өндөрлөх ажлыг тус хамт олон өөрийн хөрөнгөөр дотоод нөөц боломжоо дайчлан гүйцэтгэсэн байна. Ийнхүү тус театр 2009 онд суурилуулж байсан үзвэрийн танхимын суурин сандлаа ССАЖЗЯ-ны 79 сая төгрөгийн хөрөнгө оруулалтаар шинэчилж, 440 ширхэг сандлыг бүрэн суурилуулжээ.
Түүнээс гадна улсын төсвийн хөрөнгө оруулалтаар 54 м2 хэмжээтэй 135 сая гаруй төгрөгийн өртөг бүхий лед дэлгэцийг суурилуулсан бол театрын 1, 2 дугаар давхар, тайз болон үзэгчдийн хэсэг, гадна үүдний орчныг бүрэн камержуулж, гэрэлтүүлгийн техник хэрэгсэл, тоног төхөөрөмжийг ч тус тус шинэчилсэн байна.
Аймгийн Хөгжимт драмын театрын түүхэн замнал нь 1942 оноос эхтэй. Анх 2 гэртэй байгуулагдан аймгийн Клуб нэртэйгээр үйл ажиллагаагаа эхэлсэн бөгөөд клубийн нээлтээр Д.Нацагдоржийн “Учиртай гурван толгой” дуурийг хуучин эхээр, “Цэнд комиссар”, “Ардын зориг”, “Харанхуй засаг” зэрэг драмын жүжиг, концертыг тоглож байжээ.
Аймгийн клуб нь 1953 онд орон тооны 13 жүжигчинтэй болж өргөжин, тухайн үед уран бүтээлийн бие даасан анги бий болоогүй байсан учраас 13 жүжигчин нь жүжиглэдэг, дуулдаг, шүлэг уншдаг, бүжиглэдэг, хөгжим ч тоглодог байсан байна. Харин 1958 онд аймгийн клубийг Соёлын ордон болгон өргөтгөж орон тооны 18 жүжигчинтэй, 30 гаруй сайн дурын уран сайханчтай ажиллаж, мөн үеэс дуу, хөгжим, бүжиг, драм, үйлдвэр зохион байгуулах зэрэг мэргэжлийн ангиудтай болсон байна.
Улмаар 1977 онд 600 гаруй хүний суудалтай, 80 шахам уран бүтээлчтэй, нийт 110 ажилтантай мэргэжлийн урлагийн байгууллага болж, театрын нээлтээр Төрийн шагналт, УГЗ Бирваа, Рэгсүрэн нарын “Эрдэнэтээлийн уянга” дуурь, “Гурван бүсийн нутаг” концертыг тоглосон байна. Ийнхүү аймгийн Соёлын ордон мэргэжлийн урлагийн байгууллага Хөгжимт драмын театр болсноор жинхэнэ мэргэжлийн өнгө аястай болж, хөгжимт драмын чиглэлээр хөгжих үндэс суурийг тавьсан түүхтэй.
Мэргэжлийн театр болон үүсэн байгуулагдсанаас хойш зохиолын болон орчуулгын 40 гаруй жүжиг, 20 гаруй дуурь, 183 концертын уран бүтээл туурвиж үзэгчдийн хүртээл болгожээ. Одоо тус театр хөгжим, найрал дуу, бүжиг, драм, захиргаа аж ахуй зэрэг бүтцийн таван ангитай, 60 гаруй албан хаагчийн 80 шахам хувь нь уран бүтээлчид байна.
