Жүжигчин Линдси Лохан “Netflix”-ийн шинэ романтик кино “Return to You”-д “Crazy Rich Asians” киноны од Хенри Голдингтой хамтран тоглохоор болжээ. Тус бүтээлийг Лоханы алдарт “Mean Girls” киног найруулсан Марк Уотерс найруулах юм.
Киноны үйл явдал 2008 онд өрнөнө. Лохан амжилттай ажилладаг ч хувийн амьдралдаа ганцаардмал нэгэн өмгөөлөгчийн дүрийг бүтээх бөгөөд түүнд нас барахынхаа өмнө нэгэн эмэгтэйн нөхөртөө зориулан бичсэн DVD санамсаргүйгээр ирснээр үйл явдал эхэлнэ. Тэрыээр бичлэгт үлдсэн цөөн хэдэн сэжүүрийг даган DVD-ний жинхэнэ эзнийг олохоор аялалд гарах аж.
“Return to You” нь Лохан, Уотерс нарын олон жилийн дараах шинэ хамтын бүтээл болж байна. Тэд өмнө нь 2003 оны “Freaky Friday”, 2004 оны өсвөр үеийнхний хит бүтээл “Mean Girls” дээр хамтран ажиллаж байжээ.
Лохан киноны гол дүрийг бүтээхээс гадна продюсероор ажиллах бол зохиолыг Эрик Чампнелла бичжээ. Харин одоогоор Лохан, Голдинг нараас бусад жүжигчдийн бүрэлдэхүүн болон киноны нээлтийн товыг зарлаагүй байна.
“Return to You” нь Линдси Лоханы “Netflix”-тэй хамтарсан ээлжит романтик бүтээл юм. Тэрбээр өмнө нь тус платформын “Falling for Christmas”, “Irish Wish”, “Our Little Secret” зэрэг кинонд тоглож байв.
