Холливудын жүжигчин Кристен Стюарт Францын найруулагч Оливье Ассаястай дахин хамтран, ер бусын үзэгдлийн сэдэвтэй “Spiritual World” киноны гол дүрд тоглохоор болжээ.
Шинэ кинонд Стюарт Ада хэмээх ер бусын зөн билгийн чадвартай залуу эмэгтэйн дүрийг бүтээнэ. Ада учир битүүлэг зөгнөл, урьдчилан мэдрэх үзэгдлүүдэд шаналж эхэлснээр киноны үйл явдал өрнөх аж. Бүтээлийг Ассаясын өмнөх “Personal Shopper”-тай төстэй ер бусын, сэтгэлзүйн өнгө аястай ч илүү мэдрэмж, хүсэл тачаалын элемент агуулсан бүтээл хэмээн тодорхойлжээ.
“Spiritual World”-д Стюартаас гадна Райли Кио, Вики Крипс, Вагнер Моура, Нильс Шнайдер, Барбара Зукова нар тоглоно. Киноны зураг авалтыг 2027 оны хоёрдугаар сараас Франц болон Германд эхлүүлж, дөрөвдүгээр сар хүртэл үргэлжлүүлэхээр төлөвлөжээ. Одоогоор нээлтийн тов зарлагдаагүй байна.
Энэ нь Кристен Стюарт, Оливье Ассаяс нарын гурав дахь томоохон хамтын бүтээл болно. Тэд өмнө нь “Clouds of Sils Maria” болон 2016 оны ер бусын сэдэвт “Personal Shopper” кинонд хамтран ажилласан юм. “Clouds of Sils Maria” дахь дүрээрээ Стюарт Францын кино урлагийн нэр хүндтэй “Сезар” шагнал хүртэж байв.
