“Friends” цувралын Чандлер Бингийн дүрээр дэлхий даяар танигдсан жүжигчин Мэттью Перри донтолтоос ангижрахын тулд амьдралынхаа туршид ойролцоогоор 7 сая ам.доллар зарцуулсан талаар түүний дүү Миа Перри Боуик ярьжээ.
Тэрбээр энэ тухай “Netflix”-ийн удахгүй гарах “The One About Matthew Perry” баримтат цувралын трейлерт ярьсан байна. Миа ахынхаа донтолттой тэмцсэн урт хугацааны тэмцлийн талаар анх удаа камерын өмнө дэлгэрэнгүй ярьжээ.
Миа Боуикийн хэлснээр, Перри донтолтоосоо ангижрахын тулд асар их хүчин чармайлт гаргаж, эмчилгээ, нөхөн сэргээх хөтөлбөрүүдэд олон удаа хамрагдсан байна. “Тэр өвчнөө ямар ноцтойгоор хүлээж авч байсныг энэ нь харуулна” хэмээн дүү нь ярьжээ.
Перри өөрийн 2022 оны “Friends, Lovers, and the Big Terrible Thing” дурсамж номдоо мөн донтолтоос ангижрахын тулд 15 удаа нөхөн сэргээх эмчилгээнд хамрагдсан тухайгаа бичсэн байдаг. Тэр тухайн үед нийт зардлаа 7 сая ам.доллараас давсан гэж дурдсан бөгөөд нэг ярилцлагадаа энэ хэмжээ нь бүр 9 сая ам.долларт хүрсэн байж магадгүй гэж хэлж байжээ.
Шинэ баримтат цувралд Перригийн гэр бүлийнхэн, дотны найз нөхөд болон хамтран ажиллаж байсан хүмүүс оролцох бөгөөд түүний гэр бүлийн архиваас өмнө нь нийтэд дэлгэгдээгүй зураг, бичлэгүүд ч багтжээ. Цувралыг “Эмми”-гийн шагналт найруулагч Мэри Робертсон найруулсан байна.
“The One About Matthew Perry” нь гурван ангитай бөгөөд 2026 оны аравдугаар сарын 27-нд “Netflix”-ээр дэлхий даяар нээлтээ хийнэ.
