Хагас зуун жил кино урлагт гялалзсан Сьюзан Сарандон өнөөдөр 80 нас хүрч байна.
Сьюзан Сарандон 1946 оны энэ өдөр буюу аравдугаар сарын 4-нд АНУ-ын Нью-Йорк хотод Сьюзан Абигейл Томалин нэрээр төржээ. Тэрбээр Католик их сургуулийг драмын мэргэжлээр төгссөн бөгөөд 1968 онд бакалаврын зэрэг хамгаалсан байна. Их сургуулиа төгсөөд удалгүй жүжигчний карьераа эхлүүлжээ.
Сарандон 1970 онд “Joe” киногоор дэлгэцийн урлагийн гараагаа эхэлжээ. Үүний дараа телевизийн олон ангит бүтээлүүдэд дүр бүтээж, 1975 онд “The Rocky Horror Picture Show” мюзикл кинонд Жанет Вайссын дүрийг бүтээснээр олон улсын үзэгчдийн анхаарлыг татжээ. Тус кино хожим нь шүтэн бишрэгчдийн өргөн хүрээтэй болсон культ бүтээлүүдийн нэг болсон юм.
1970-аад оны сүүлээс Сарандон илүү олон төрлийн дүр сонгон тоглож эхэлсэн бөгөөд “Pretty Baby” (1978), “The Hunger” (1983), “The Witches of Eastwick” (1987) зэрэг кинонд тоглосон байна.
1980 онд Луи Маллийн найруулсан “Atlantic City” кинонд тоглосон нь Сарандонд “Оскар”-ын шилдэг эмэгтэй жүжигчний анхны нэр дэвшлийг авчирсан юм. Дараа нь “Thelma & Louise” (1991), “Lorenzo’s Oil” (1992), “The Client” (1994) киноны дүрүүдээрээ мөн уг шагналд нэр дэвшжээ.
1991 оны “Thelma & Louise” кинонд Жина Дэвистэй хамтран тоглосон нь түүний карьерын хамгийн алдартай бүтээлүүдийн нэг болсон. Харин 1988 оны “Bull Durham” спортын драмд Кевин Костнерийн хамт тоглож, өөрийн дүрийн хүрээг дахин тэлсэн байна.
1995 онд Сарандон “Dead Man Walking” кинонд гэлэнмаа Хелен Прежений дүрийг бүтээжээ. Шон Пеннтэй хамтран тоглосон уг бүтээл дэх тоглолтоороо тэрбээр 1996 онд “Оскар”-ын шилдэг эмэгтэй жүжигчин шагналыг хүртсэн байна. Мөн уг дүрээрээ Жүжигчдийн эвлэлийн шагналыг хүртжээ.
Түүний дараагийн он жилүүдэд “Stepmom” (1998), “Enchanted” (2007), “The Lovely Bones” (2009), “Cloud Atlas” (2012), “Tammy” (2014), “The Meddler” (2015) зэрэг олон кино нэмэгдсэн байна.
Сарандон зөвхөн кино урлагаар хязгаарлагдаагүй. Тэрбээр 1972 онд “An Evening with Richard Nixon” жүжгээр Бродвейн тайзнаа анх гарч, 2009 онд “Exit the King” жүжгийн шинэчилсэн хувилбараар Бродвейд эргэн иржээ.
Телевизийн салбарт “Friends”, “Malcolm in the Middle”, “Bernard and Doris”, “You Don’t Know Jack”, “Feud” зэрэг бүтээлд тоглосон бөгөөд 2017 оны “Feud: Bette and Joan” цувралд жүжигчин Бетт Дэвисийн дүрийг бүтээсэн байна.
Сьюзан Сарандон карьерынхаа турш “Оскар”-оос гадна BAFTA, SAG болон бусад олон шагнал хүртжээ. Түүний уран бүтээлийг Каннын кино наадмын “Kering Women in Motion Award”, Сан-Себастьяны кино наадмын “Donostia Lifetime Achievement Award”, 2002 онд Холливудын алдрын гудамжинд түүний нэр бүхий одыг байршуулсан гэх зэргээр үнэлсэн байна.
