Дуучин Т.Солонго Asu.mn сайтын “My career” ярилцлагын нэвтрүүлэгт оролцож, “Эмоушн” хамтлагийн бүрэлдэхүүнд багтаж уран бүтээлээ туурвиж байсан үе болоод тус хамтлагаас гарсан шалтгаан, өөрийн хувийн амьдралд тохиолдсон уй гашуу, хүнд үеийг хэрхэн даван туулсан тухайгаа хуваалцжээ.
Тэрбээр эл нэвтрүүлгийн үеэр “Урлагаар яваагүй байсан бол би аль хэзээний галзуурчих байсан болов уу. Тиймээс би урлаггүйгээр өөрийгөө төсөөлж чадахгүй. Мөрөөдлөө орхихгүй байхад биелэх нэг өдөр ирнэ. Миний доторх сэтгэлийн гал, мөрөөдлийн гал хэзээ ч унтардаггүй. Цаашддаа уран бүтээлээ хийж, пянзаа гаргана. Хэдий хугацаа зарцуулах нь хамаагүй. Бага багаар ч хамаагүй хийгээд явна л гэж боддог” гэжээ.
Монголын поп хөгжмийн нэгэн үеийн тод өнгө төрх болсон Т.Солонго Хөгжим бүжгийн коллеж (өнөөгийн Монгол Улсын Консерватори)-д мэргэжлийн төгөлдөр хуурч мэргэжил эзэмшиж, улмаар Гавьяат жүжигчин А.Бүтэд багшийн удирдлагад дуулаачаар суралцжээ.
1998 оноос “Эмоушн” хамтлагийн бүрэлдэхүүнд багтаж, 2000-гаад оны дунд үе хүртэл уран бүтээлээ туурвижээ. 2010 оноос Т.Солонго “Maestro” хөгжмийн сургуулийг ажиллуулж, хөгжимд дуртай, хөгжмийг ойлгож сонсдог ирээдүйн сонсогчдыг бэлтгэхэд өөрийн авьяасыг зориулж байна.
