“Queen” хамтлагийн гитарчин Брайан Мэй хамтлаг цаашид дахин аялан тоглолт хийхгүй гэж мэдэгджээ. Тэрбээр 50 жилийн турш аялан тоглолт хийснийхээ дараа хувийн эрх чөлөөгөө золиослохыг хүсэхээ больсон гэж тайлбарласан байна.
Өдгөө 79 настай Брайан Мэй “The Times” сонинд өгсөн ярилцлагадаа ойролцоогоор 18 сарын өмнө дахин аялан тоглолт хийхгүй гэсэн шийдвэр гаргаснаа хэлжээ. Түүний хувьд аялан тоглолтын үеэр гэр бүлийн дотны хүн нь нас барсан ч гэртээ очиж, эргэн ирэх боломж хязгаарлагдмал байсан нь энэ шийдвэрт нөлөөлсөн байна.
“Би тоглох дуртай, аялах ч дуртай. Гэхдээ үүний төлөөс нь эрх чөлөөгөө золиослох явдал. Надад эхнэр Анита Добсон, ач зээ нар, мөн хийхийг хүсдэг астрофизикийн олон ажил бий. Тиймээс 50 жил хангалттай байж магадгүй” хэмээн Мэй ярьжээ.
Гэхдээ энэ нь “Queen” хамтлагийн хөгжмийг дахин тайзнаа хүргэх бүх боломжийг үгүйсгэсэн гэсэн үг биш аж. Мэй өнгөрсөн жил Лондон дахь “Sphere”-д зочилсныхоо дараа “Queen” хамтлагийн хөгжмийг ашигласан иммерсив шоу хийх санаа төрсөн гэж ярьсан байна.
Тэрбээр ийм төрлийн бүтээлийг орчин үеийн технологийн тусламжтайгаар хийх боломжтой гэж үзэж байгаа ч хиймэл оюун ухаан (AI) ашиглахтай холбоотой зарим асуудалд болгоомжтой хандаж байгаагаа илэрхийлжээ.
“Queen” хамгийн сүүлд Адам Ламбертын хамт “Rhapsody” дэлхийн аялан тоглолтоо хийсэн бөгөөд уг аялан тоглолт 2024 оны хоёрдугаар сард өндөрлөсөн юм.
