Модон барын баримтат өв: Бүртгэл, хадгалалт хамгаалалт ба хүртээмж” сэдэвт олон улсын эрдэм шинжилгээний хурал Үндэсний номын сангийн салбар номын санд эхэллээ.
Хоёр өдөр үргэлжлэх тус эрдэм шинжилгээний хурал нь олон улсаас эрдэмтэн судлаачид, куратор, номын сан болон соёлын өвийн мэргэжилтнүүд нэгэн дор чуулж, модон бар хэвийн баримтат өвийг хадгалж хамгаалах шилдэг сайн туршлага, шинэ тутам гарч ирж буй орчин үеийн технологи, арга зүй болон хамтын ажиллагааны нэгдсэн стратегийн талаарх салбар хоорондын хэлэлцүүлэг хийх боломжийг олгож буйгаараа онцлогтой. Мөн гар бичмэл, модон барын хэвлэмэл ном судрын өвийн судалгааны чиглэлээр олон улсын хамтын ажиллагааг бэхжүүлэхэд чухал хувь нэмэр болох юм.
Дэлхий дээр модон барын соёл уламжлалтай долоон улс бийгээс олон улсын эрдэм шинжилгээний хуралд Монгол, Солонгос, Япон, Герман, Вьетнам гэсэн таван орны төлөөлөл, эрдэмтэн судлаачид илтгэл хэлэлцүүлж байна.
Түүнчлэн хурлын үеэр Үндэсний номын сангийн сан хөмрөгт хадгалагдаж буй ховор нандин бар хэвүүдийн дээжээс сонин содон үзэсгэлэн дэглэн хурлын төлөөлөгчид, олон нийтэд толилууллаа. Үүний зэрэгцээ Монголчуудын бар хэвлэлийн өв, түүний төрөл зүйлүүдийг таниулан сурталчлах, судалгааны эргэлтэд оруулах үүднээс “Монгол Улсын Үндэсний Номын сан дахь модон бар” каталог номыг эрхлэн хэвлүүлжээ.
