Ардын дуу хөгжим, ардын урлагаа хөгжүүлэн дэлхийд таниулах, сурталчилах, орчин үеийн урлагтаа хослуулан бүтээл туурвих сонирхолтой шинэ залуу уран бүтээлчид сүүлийн үед хүч түрэн гарч ирэх болсон. Тэдний нэг бол Хөгжим бүжгийн коллежийн симфони найрал хөгжмийн ангийн оюутан, хуучирч Э.Цэндсүрэн юм. “Надежда” олон улсын наадмын тэргүүн байрын шагналтай тэрээр С.Гончигсумлаагийн нэрэмжит Хөгжим бүжгийн коллежид орсон цагаасаа эхлэн амжилттай суралцаж, 2008-2014 оны хооронд гурван ч удаагийн бие даасан тайлан тоглолтоо хийсэн байна.
Энэ удаа “Folk meets classic” нэртэй бие даасан тоглолтоо улсын филармоний тайзан дээрээс үзэгч олондоо хүргэхээр болжээ. Түүний тоглолтын удирдаачаар УГЗ Ч.Чинбат ажиллах бөгөөд тоглолт энэ бямба гаригийн 18.00 цагт болох юм. Тоглолтод Монголын төдийгүй дэлхийн сонгодог хөгжмийн зохиолчдын ая, зохиолуудаас шилэн хуучрын эгшгэнд тоглож сонордуулах аж.
Э.Цэндсүрэн нь хэдийгээр нас залуухан ч энэ төрөлдөө цойлон гарч ирж буй туршлагатай хуучирчдын нэг гэдгийг түүний тоглосон тоглолтууд болон үзүүлсэн амжилт нь гэрчлэнэ. Тухайлбал, Франц Монголын оюутнуудын хамтарсан тоглолт, ‘’Их талын джаз” олон улсын джаз фестиваль, “Алтан намар” хөгжмийн наадам, Монголын хөгжмийн зохиолчдын концерт, тоглолтуудад гоцлол хөгжимчнөөр оролцож, нэр хүнд бүхий 30 гаруй тоглолтод оролцож байжээ.
Түүнчлэн 2009 онд МУГЖ, дэд профессор С.Цэвэлмаагийн нэрэмжит “Өсвөрийн хуучирчдын улсын анхдугаар уралдаан”-ы тэргүүн байр, 2012 онд МУАЖ, Төрийн шагналт Л.Мөрдоржийн нэрэмжит “Үндэсний хөгжимдийн улсын II уралдаан”-ы дэд тэргүүн байр, 2012 онд зохиогдсон МУТШ, УГЗ Б.Шаравын нэрэмжит “Үндэсний хөгжимчдийн олон улсын анхдугаар уралдаан”-ы гуравдугаар байрын шагналт шилдэг, залуу хөгжимчин юм. Хамгийн сүүлд ОХУ-ын Красноярск хотноо зохиогдсон “Надежда” олон улсын Х уралдаанээс тэргүүн байр эзэлжээ.
Ингээд та бүхнийг шилдэг залуу бүрэн бүтээлчийн хуучраар хөгөлсөн нэгэн үдшийг хамтдаа өнгөрүүлэхийг урьж байна.
www.URLAG.mn
