Монголд анх удаа цахилгаан унадаг дугуй болон мопед үйлдвэрлэн “Унадаг дугуйтай Улаанбаатар” төслийг дэмжин ажиллаж байгаа “Никель Ганбаа” компанийн залуус нэгэн сайн үйлсийн аяныг эхлүүлсэн байна. Тэд унадаг дугуй үйлдвэрлэх ажлынхаа хажуугаар сүүлийн нэг жилийн хугацаанд хөгжлийн бэрхшээлтэй иргэдийн хэрэгцээнд зориулан дотооддоо тэргэнцэр үйлдвэрлэж байгаа юм. "Никель Ганбаа” компанийн залуус эдгээр бүтээгдэхүүнийхээ дээжээс буюу нийт 50 ширхэг тэргэнцрийг нэн шаардлагатай иргэдэд нь бэлэглэх аяныг эхлүүлжээ.
Тэд өнгөрсөн арванхоёрдугаар сард таван хүнд тэргэнцэр бэлэглэсэн юм. Тиймээс энэхү аянаа үргэлжүүлэн “Nikel Ganba Winter Charity”-г гуравдугаар сар хүртэл өрнүүлэн нийт 50 хүүхэд, томчуудад өөрийнх нь онцлогт тохирсон чанартай тэргэнцрийг бэлэглэх зорилго өвөрлөн ажиллаж байгаа аж. https://www.facebook.com/nikelganba цахим хуудсаар зочлон энэхүү хандивын аяны талаар дэлгэрэнгүй мэдээллийг авч болох нь ээ.
“Nikel Ganba Winter Charity” хандивын үдэшлэг энэ сарын 24-нд “Минт” клубт болох аж. “Минт” клуб болон Никель Ганбаа төслийнхөний хамтран зохион байгуулж буй энэхүү зорилтот сайн үйлсийн аян хандивийн тоглолтын орлогоор Хан-Уул дүүргийн хөгжлийн бэрхшээлтэй хүүхдүүдэд тэргэнцэрээр туслах бөгөөд эмзэг давхаргын өрх айлуудад тусламж хүргэх юм байна. Уг хандивын тоглолтонд “Lemons”, “A-Sound”, “X-Vit”, “Fix”, “Rec On” хамтлагууд болон ая зохиогч Ганг, дуучин Daisy нар оролцон ая дуугаа өргөх нь ээ
www.Urlag.mn
