“Aurora” филмийн найруулагч Б.Чингүүн болон “Х-түц” продакшны жүжигчин И.Одончимэг нарын хамтран найруулсан “Танхай тээгч” инээдмийн уран сайхны кино нээлтээ хийснээс хойш долоо хоногийн хугацаанд 140 сая төгрөгийн ашиг, орлогоороо монгол киноны урьд өмнө олж байгаагүй ашгийг олоод байгаа аж.
Уг кино шинэ оны анхны бүтээл болон нэгдүгээр сарын 1-нээс эхлэн үзэгчдийн хүртээл болж байгаа юм. Гэр бүлийн аз жаргалд мөнгө чухал уу, үр, хүүхэд чухал уу гэдгийг хөнгөн инээдтэй хослуулан хийсэн уг бүтээл үзэгчдийн дунд эрэлттэй байгаа юм.
Төмөрөө, Нараа хоёр хэнээс ч дутахгүй сайхан амьдралтай залуу гэр бүл. Гэвч Нараа хүүхэд тээж төрүүлэх боломжгүй учраас тэд тээгч эхийн тусламжтайгаар хүүхэдтэй болохоор шийддэг. Гэрээний дагуу тээгч эх төрөн төртлөө тэднийд хамтамьдрана. Гэвч тээгч эхийг хэн гэдгийг тэдний хэн нь мэдсэнгүй. Хүүхэдтэй болохын тулд тэр хоёр ямар амьдрал туулахыг энэхүү киноноос үзээрэй.
Сонирхуулахад, “Танхай тээгч” кино багийнхан шинэхэн бүтээлээ Дарханчуудад толилуулсан бол энэ удаад Өмнөговьчуудад зориулан дэлгээд байгаа юм. Энэ сарын 13, 14, 15-нд Өмнөговь аймгийн “Галакси” театрт “Танхай тээгч”-ийг тольдож болох нь ээ.
Мөн тэд ирэх гуравдугаар сарын 4-8-ныг дуустал Эрдэнэтчүүдэд “Танхай тээгч” бүтээлээ толилуулна гэсэн шүү.
Эх сурвалж: Eagle.mn
