Дэлхийн кино урлагийн шилдгүүдийг тодруулдаг “Оскар”-ын 87 дахь удаагийн шагнал гардуулах ёслол АНУ-ын Калифорни мужийн Лос-Анжелес хотын “Долби” театрт болж өнгөрлөө.
Энэ жилийн шагнал гардуулах ёслолын ажиллагаа эхлэхэд хөтлөгч Нейл Патрик Харрис “Энэ үдэш бид бүхэн Холливуудын хамгийн шилдэг, хамгийн “Цагаан”.. оддыг төрүүлэх болно” хэмээн хэлсэн нь олны анхаарлыг татаад байна.
Магадгүй тэрбээр Оскарт нэр дэвшиж байгаа жүжигчидтэй холбоотойгоор шүүмжлэлтэй хандаж байгаагаа ийнхүү илэрхийлсэн биз ээ. Учир нь энэ жилийн “Оскар”-ын эрэгтэй гол дүр болон эмэгтэй гол дүрийн төрөлд хар арьст жүжигчин огт нэр дэвшээгүй юм. Мэдээж Оскар бол тухайн дүрээ хамгийн сайн гаргаж чадсан жүжигчин нэр дэвшиж шалгардаг болохоор хар цагаан арьсаар ялгаварлан гадуурхах учиргүй юм.
Заавал хар арьстнууд орох, багтах ёстой гэсэн үзэл биш юм. Магадгүй хөтлөгчийн амнаас “Цагаан “ гэдэг үг унаагүй бол энэ асуудал тэгсхийгээд л өнгөрөх байсан биз ээ. Гэхдээ Оскарын шагнал гардуулах ёслол кино урлагийн хөгжлийн чиг хандлагыг тодорхойлохоос гадна улс төрийн үйл явцыг зарим талаар тусгаж байдгийг үгүйсгэх аргагүй юм.
Эх сурвалж: New.mn
