ХАНГАЙН МАГТААЛ

Хангай хааны хүрэн хүдэр баян загал уул нь
Сүүмэлзэн харагдаад
Хавцал эх бүрээс нь мөрөн далай голын ус нь
Цэлэлзэн урсаад байна гэдэг маань
Ердөө л өлзийтэйхэн хангай чинь,
Манай лаа Идэр, Тэрхийн
Өвгөн буурал, баян хангай нутаг минь ээ! Өрөөлдөөд тавьсан моринд нь өлөг боргоор элбэгтэйхэн
Өнчин буурал амьтандаа
Өршөөлтэйхэн хангай чинь
Манай лаа Идэр, Тэрхийн
Өвгөн буурал, баян хангай нутаг минь ээ!
Хангай хааны Гундаа шар нуруунд барин түшин гарвал даа
Гурван тохой хурц тоорой мод нь, дөрөө зуран шаагин ганхаад
Гурвалжин зоотой бор халзан туулайгий чинь, гунан хар бүргэд нь
Аван барин, шүүрэн байна гэдэг маань
Ердөө л өлзийтэйхэн хангай чинь
Манай лаа Идэр, Тэрхийн
Өвгөн буурал, баян хангай лаа нутаг минь ээ!
Хангай хааны харанхуй хар модондоо, барин түшин орон очвол
Ханцуйтай гарын чинээ хар халиун хэрэм нь, халин дүүлээд
Халиун цагаан буга нь харайлдаад л
Харцгаа түрэн урамдаад минжийн олон согоогоо дагуулав гэлээ.
Ийм л сайхан хангай чинь
Манай лаа Идэр, Тэрхийн
Өвгөн буурал, баян хангай лаа, нутаг минь ээ!
Хангай хааны баруун талыг нь, барин түшин гарвал даа
Бар, ирвэс, баавгай шилүүс нь бархиралдан ноцолдоод л
Зүүхэн талыг нь, барин түшин гарвал даа
Зүр гур нь зөрөлдөөд зүйл зүйлийн амьтан бужигнаад
Зурам тарвага нь тачигнаад байдаг гэнэ ээ
Ийм л сайхан хангай чинь
Манай лаа Идэр, Тэрхийн
Өвгөн буурал, баян хангай лаа, нутаг минь ээ!
Хангай хааны хажуухан талыг нь, барин түшин гарвал даа
Хар халзан тэх, хамаг олон гөрөөс нь, харгалдан зөрөлдөөд
Халзан цагаан аргал нь, багшраад байдаг гэнэ
Ам судаг өөд нь өгсөөд харвал даа, суу хаяиу, суусар булга
Минж, согоо, мэгж, бодон, мэхээрийн бор хүртэл
Элбэгтэйхэн байдаг гэнэ
Ийм л сайхан хангай чинь
Манай лаа Идэр, Тэрхийн
Өвгөн буурал, баян хангай лаа, нутаг минь ээ!
Ам бүрийг нь харвал даа, рашаан тамир нь ханхалсан
Арван гэрийн хүн амьтны, архаг өвчнийг эдгээсэн
Арвин баян хангай минь
Манай лаа Идэр, Тэрхийн
Өвгөн буурал, баян хангай лаа, нутаг минь ээ!