Модод нахиалах үеэр бодол ээдэн байхад
Борхон зүрх минь хослон цохилохыг хүснээ
Дэнж ногоорох зунаар сэтгэл баясан байхад
Дэргэд минь байгаач гээд тольтоо хүлээнэ
Ижил нь үгүй бол дутдаг энэ хорвоод
Эгэл нэгэн хайр чамайгаа хүсэн мөрөөднө
Навчис хийсэх цагаар гуниг үерлэн байхад
Нандин зүрх минь ханьсан цохилохыг хүснэ
Улиас нь гундах намраар сэтгэл сэмрэн байхад
Уянга минь болооч гээд голтоо тосон хүлээнэ
Ижил нь үгүй бол дутдаг энэ хорвоод
Эгэл нэгэн хайр чамайгаа хүсэн мөрөөднө
Мичид гудайх үдшээр нойроо үргээн байхад
Өнчин зүрх минь ижилсэн цохилохыг хүснэ
Жавар хургах өвлөөр сэтгэл жиндэн байхад
Өвөрт минь ирээч гээд өрөө тосон хүлээнэ
Ижил нь үгүй бол дутдаг энэ хорвоод
Эгэл нэгэн хайр чамайгаа хүсэн мөрөөднө
Хайлаас дэлгэрэх үүрээр хүсэл чагтлан байхад
Хүрэн зүрх минь нийлэн цохилохыг хүснэ
Яргуй хэнзлэх хавраар сэтгэл нялхран байхад
Янаг минь үнсээч гээд хайраа тосон хүлээнэ
