Сошиал орон зай гэдэг хувь хүний үзэл бодлоо илэрхийлэх цахим индэр болж байдаг. Улмаар нийгмийн сүлжээ хэрэглэгчдийн тоо ч улам олширч, юу дуртайгаа ямар нэг шүүлтүүргүйгээр постолж, эсвэл хэн нэгэн хүний нэр хүндэд халдаж, гүтгэн доромжлох явдал газар авсан билээ.
Тэгвэл Германы конгрессын нэгэн ахмад гишүүн фэйсбүүк зэрэг нийгмийн сүлжээнд арьс өнгөөр ялгаварлан гадуурхах, хэн нэгнийг гутаан доромжилсон утга агуулга бүхий пост нийтэлсэн цахим хэрэглэгчийг торгох шаардлагатай гэх саналыг гаргажээ. Тус улс дүрвэгсдийг хүлээн авч эхэлснээс хойш цахим сүлжээнд гадны иргэдийг үзэн ядах үзэл дэлгэрэх болсон байна.
Улмаар цаг үеийн энэхүү шаардлагатай уялдуулан канцлер Ангела Меркелийн улстөрийн хүчинд харъяалагдах Волкел Каудер тус саналыг гаргажээ. Түүний саналыг Германы Хууль зүйн сайд Хейко Маас ч дэмжиж, нийгмийн сүлжээнд тавих хяналтыг чангатгах шаардлага байгааг онцолсон гэнэ. Тус улсад өнгөрсөн жилийн арванхоёрдугаар сараас хойш фэйсбүүк, твиттер, гүүгл зэрэг сайтад гадаадын иргэдийг арьс өнгөөр ялгаварлан гадуурхсан, үзэн ядсан утга агуулга бүхий постод хоногийн 24 цагийн турш хяналт тавьж, устгуулах чиглэлээр ажиллаж иржээ. Гэсэн ч, цагдаагийн байгууллагаас тавьсан шаардлагыг үл тоон, үргэлж гутаан доромжилсон пост оруулах хүмүүсийн тоо тасраагүй байна.
Тиймээс Волкел Каудер нийгмийн сүлжээний хэрэглэгч хэм хэмжээ зөрчсөн утга агуулга бүхий постоо нэг долоо хоногийн хугацаанд устгаагүй тохиолдолд пост тус бүрийг 50 мянган еврогоор тооцон мөнгөн торгууль ногдуулах саналыг гаргажээ.
Эх сурвалж:www.mminfo.mn
