Ганга нуурын талаас илүү хувь нь ширгэсэн гэх таагүй мэдээлэл нэг хэсэгтээ гарсан. Тиймээс Ганга нуурын усыг сэргээхээр олон ажлуудыг хийж эхэлсний үр дүнд нуурын ус эргэн сэргэж эхэлснээр зогсохгүй нууранд 16 төрлийн шувуудаас гадна 690 хун чуулж байгаа мэдээллийг холбогдох хүмүүс өгсөн байна.
Энэ зун долоо, наймдугаар сард агаарын температур олон жилийн дунджаас 1-10 хүртэл хэмээр өсч хэт халалт үүссэн. Олон жилийн дундаж хур тунадасны хэмжээний дөнгөж 20 орчим хувь нь орсон нь нуур ширгэх гол шалтгаан болжээ.
Мөн ойр орчмын Холбоо, Зүүн холбоо, Цагаан, Улаан тойром, Эрдэнэ, Сүмт, Хошмог зэрэг нуурууд ширгэснээс малчид малаа Ганга нуур, түүний усаар тэжээдэг Оргих, Баянбулагаас услах болсон нь нуурын усны ширгэлтэд нөлөөлсөн гэж нутгийнхан ярьжээ. Цаг агаарын хуурайшилт, малын ачаалал зэргээс болоод Ганга нуурыг тэжээдэг Оргихын булаг, Баян булаг хоёрын урсгал ч татарчээ. Дарьганга сумын зүүн хойно орших Дуут нуурын ус ч татарсан байсан аж.
