Оны тэргүүний багш шалгаруулах “Оюунлаг үйлстэн” ёслолын ажиллагаа болох гэж байна. Тодруулбал, МЗХ-оос Сурган хүмүүжүүлэх үйлсэд эрдэм мэдлэгээ зориулж буй багш нарыг урамшуулан алдаршуулах зорилгоор оны тэргүүний багш шалгаруулах “Оюунлаг үйлстэн” ёслолын ажиллагааг анх удаагаа 2016. 12. 16-нд зохион байгуулж Монголын Залуучуудын Холбооны нэрэмжит “Тэргүүний залуу багш “ цол тэмдэг, өргөмжлөлийг олгохоор болжээ.
Тэргүүний залуу багшийг “Оны тэргүүний арга зүйтэй залуу багш”, “Оны тэргүүний судлаач залуу багш”, “Оны тэргүүний нийгмийн идэвхтэн залуу багш”, “ Оны тэргүүний нийгмийн ажилтан”, “Оны тэргүүний сургалтын менежер” гэсэн 5 төрлөөр тус бүр 2 багшийг шалгаруулах аж. Түүнчлэн нэр дэвшүүлэх багш нь сурган хүмүүжүүлэх салбарт 3-аас дээш жил ажилласан, хариуцсан ажлын үзүүлэлт нь улс, хот, аймгийн дундаж түвшингээс дээшилсэн, дотоод болон гадаадын эрдэм шинжилгээ, онол практикийн хуралд илтгэл тавьж, судалгааны ажил бүтээл гаргаж, мэргэжлийн сэтгүүлд хэвлүүлсэн байх гэхчилэн шалгуурууд тавигджээ.
Нэр дэвшигчийн материалыг 2016. 12. 12-ныг хүртэл МЗХ-ны байранд хүлээн авах бөгөөд ирүүлсэн нийт нэр дэвшигчдийн дотроос 20 багшийг II шатанд шалгаруулах юм байна. Шалгарсан оролцогчдоос 10 багш “Оны тэргүүний багш“-аар тодорч, МЗХ-ны нэрэмжит “Тэргүүний залуу багш” цол тэмдэг, өргөмжлөл, ивээн тэтгэгч байгууллагын шагнал хүртэх нь.
