Дэлхий нийтээрээ зохиогчийн эрх, оюуны өмчийг дээдэлдэг болсон энэ цаг үед манай улс ч мөн адил энэ тал дээр анхаарал хандуулж, олон арван ажлыг зохион байгуулсаар нэлээдгүй он жилүүдийг өнгөрүүлсэн. Гэсэн хэдий ч манайд хэрэгжиж буй зохиогчийн эрх, оюуны өмчийн асуудлын хөгжлийн үйл явц удаашралтай, шүүмжлэл дагуулсан хэвээр байгаа билээ.
Хөгжлийн энэ цаг үед төрийн байгууллагууд зохиогчийн эрх, оюуны өмчийн асуудалд илүү ач холбогдол өгч, бодлогын төвшинд зохицуулалт хийж ажиллах хэрэгтэй хэмээн үзэж, Нийслэлийн Соёл, урлагийн газраас санаачлан “Зохиогчийн эрх, түүнд хамаарах эрхийн тухай хууль”-ийн талаар зөвлөгөө мэдээлэл өгөх лекц, сургалтыг соёл, урлагийн чиглэлээр үйл ажиллагаа явуулдаг төрийн болон төрийн бус байгууллагууд, мэргэжлийн холбоод, аж ахуй нэгжүүд, их дээд сургуулиудад цувралаар зохион байгуулахаар болж эхний сургалтаа Соёл, урлагийн их сургуульд зохион байгуулахаар болоод байна.
Сургалт 2017 оны 02-р сарын 22-нд 13:00 цагаас Соёл, урлагийн их сургуулийн Уран зургийн тэнхимийн төгсөх курсийн оюутан залуучуудад зориулж, Өмгөөлөл, хууль зүйн үйлчилгээний “Сувд партнерс” ХХНөхөрлөлийн захирал, өмгөөлөгч Э.Болорчулууны лекц, сургалтыг зохион байгуулах гэж байна.
