Монголын язгуур урлагийн гайхамшигт өв соёлыг сурталчилан, таниулах ирмүүн зорилгын дор нэгдэн нийлсэн Хөсөгтөн багийн АНУ, Канад улсаар хийж буй аялан тоглолт амжилттай үргэлжилж байна. Гуравдугаар сарын 3-наас Канадын Оттава хотоос эхэлсэн энэхүү аялан тоглолт одоогоор нийт таван хотод зохион байгуулагдаад байна.
Канадын Торонто хотноо болсон PDAC уул уурхайн олон улсын чуулга уулзалтанд тус багийнхан уран бүтээлийн дээжээ өргөснөөс гадна Буддын шашины хосгүй бүтээлүүд тэр дундаа Өндөр гэгээн Занабазарын ховор нандин бүтээлүүд хадгалагддаг Нью Йорк хот дахь Рубины музейд тоглолтоо толилуулсан юм. Үүнээс гадна Хөсөгтөн хамтлаг НҮБ-ын төв байранд дэлхийн 100 гаруй орны зочид, төлөөлөгчдөд Монголын өв соёл, язгуур урлагийн гайхамшгийг мэдрүүлсэн анхны Монгол хамтлаг болж байгаагаараа онцлог юм.
