Олон ястаны өлгий, баруун бүсийн тулгуур төв Ховд аймагт “Залуу малчдаа дэмжих аян” хүрч ажиллажээ. УИХ-ын гишүүн Д.Гантулга Монгол цэргийн өдөр, Зэвсэгт хүчин байгуулагдсаны 96 жилийн ойг тохиолдуулан цэргийн гавьяаны улаан тугийн одонт, Хатанбаатар Магсаржавын нэрэмжит, Ховд аймаг дахь зэвсэгт хүчний 123-р ангийн жагсаалд оролцож, Монгол цэргийн өдрийн баярын мэнд хүргэлээ. Мөн аймгийн засаг дарга Д.Галсандондог, ИТХ-ын дарга Г.Пүрэвганди болон холбогдох албаныхантай уулзаж, аймгийн хөгжлийн бодлого, асуудал шийдэл, малчдын тухай зэрэг олон асуудлаар санал солилцжээ.
Аймгийн төрийн албан хаагчдад Монгол төрийн тухай, төрийн албан хаагчийн ёс зүй, зөв хандлагын талаар “Менежерээс манлайлалд” сэдвээр лекц уншжээ. Залуу малчин аяны хүрээнд аймаг бүрээс нэг малчин өрх сонгож тавин эм төлөг бэлэглэж байгаа. Энэ удаад Ховд аймгийн Дөргөн сумын малчин О.Ганбаатарт тавин эм төлөг өгчээ. О.Ганбаатар нь эхнэр, найман хүүхдийн хамт ам бүл арвуулаа амьдардаг, тавь гаруй толгой малтай юм байна. Аяныг Монгол поп опера Уверютура хамтлаг “Монгол минь” тоглолтоороо дэмжин оролцож байгаа төдийгүй тоглолтын орлогоосоо малчдад хандивлаж байгаа хонины санхүүжилтийг бүрдүүлж байгаа юм байна. УИХ-ын гишүүн Д.Гантулга ММСЗУХ-ны тэргүүнээр ажилладаг. Энэ хүрээнд аймаг бүрт холбооныхоо салбар холбоог байгуулж байгаа. ММСЗУХ-ны ЕНБД Н.Мөнхбаясгалангийн хамт Ховд аймгийн салбар холбоог хуралдуулж, холбооны даргаар Т.Заяаг сонгосон юм.
