Монголын эзэнт гүрний Их хатдын нууцлаг түүхийголон орны эрдэмтэн судлаачид эх сурвалжид тулгуурлан судалж, цөөнгүй ном бүтээл олны хүртээл болж байсан. 2010 онд Америкийн нэрт эрдэмтэн Жэк Уэтерфорд“Монголын их хатдын нууц товчоо” хэмээх номоо хэвлүүлж байсан бол өдгөө 2017 оны босгон дээр судлаач Ч.Содбилэгийн “Сэнтий түшсэн хатад” хэмээх ном нээлтээ хийснээр дундад зууны үед түүхэнд онцгой үүрэг гүйцэтгэсэн ч төдийлөн судлагдаагүй Монгол хатдын тухай бүтээл олны хүртээл боллоо.
Түүхийн ухааны доктор Д.Өлзийбаатар уг номын нээлтийн үеэр хэлэхдээ, “Энэхүү ном нь Монголын Их хааны хатнаар өргөмжлөгдөн төрийн их сэнтийн дэргэд суудал засуулах хувьтай төрсөн бүсгүйчүүдийн нууцлаг агаад сургамж, ухаарлаар дүүрэн намтар түүхийг өгүүлнэ” гэж дүгнэсэн юм. “Сэнтий түшсэн хатад” ном нь Их хааны хатдын тухай болон Солонгосын вангуудтай ураг барилдсан найман Монгол гүнжийн намтар бүхий хоёр бүлэгтэй бөгөөд эл номонд нийт уншигчдад зориулан түүхэн найруулал хэлбэрээр бичигдсэн байна. Ази тивийг бүхэлд нь захирч байсан Монголын Их Юань гүрний эзэн хааны хатад эрх мэдлийн гол учгийг атгаж, хөвгүүдээ хаан сэнтийд өргөмжилж, ордны зөрчил тэмцэл, аугаа гүрний ирээдүйн хувь заяаг тодорхойлж байсан хатдын нууцлаг түүхийг энэ номноос мэдэх боломжтой аж.
