Боловсрол суваг телевизийн “Яг түүн шиг-2” шоуны хоёр дахь удаагийн тоглолт эхэллээ. Ням гаригийн үдэш бүр үзэгчдийг цэнхэр дэлгэцийн өмнө уядаг “Яг түүн шиг-2” шоуны хоёр дахь дугаарт “Камертон” хамтлагийн дуучин Г.Мэнд-Амар, дуучин А.Хишигдалай, “Х Түц” хамтлагийн жүжигчин Т.Бархүү, “Эмоци” хамтлагийн жүжигчин Б.Ариунцэцэг, дуучин Б.Халиун, дуучин С.Гантогоо, төгөлдөр хуурч С.Алимаа буюу Ами нар оролцох нь тодорхой байсан бол найм дахь оролцогч нь анхны дугаар дэлгэцээр цацагдтал нууц хэвээр байсан юм. Тэгвэл өчигдөр үдэш (2017.04.02) “Яг түүн шиг-2” шоуны анхны дугаар дэлгэцээр цацагдаж, найм дахь оролцогч буюу нууц ноёнтон тодорч, “Яг түүн шиг” шоуны анхны дугаарын шүүгч “Шар айраг” хамтлагийн ахлагч Г.Ганхүү байлаа. Тэрбээр уг шоунд оролцох гаргалгаагаа сошиал ертөнцөөр аялах явцдаа олсон гэдгээ зарласан юм. Тэрбээр “Яг түүн шиг-2” шоунд 60, 70-аад оныхныг төлөөлж оролцох бөгөөд олимпын “Түрүүлэхдээ биш оролцохдоо” гэдэг зарчмыг баримтална гэсэн юм.
Харин Г.Ганхүүгийн оронд продюссер Б.Наранзун уг шоуны шүүгчийн суудалд суулаа. Жүжигчин Н.Онон дахин шүүгчээр ажиллаж байгаа бол зочин шүүгчээр жүжигчин Г.Ундармаа уригдсан юм. Хөтлөгч Э.Цолмонбаяр түүнийг “Хүмүүнлэгийн үйлсийн элч” хэмээн өргөмжилсөн. Шоуны бас нэгэн шүүгч бол жүжигчин, хөтлөгч Болдоо солигдоогүй, ажлаа үргэлжллүлж байгаа. Тэрээр оролцогчдыг угтан золгож, лифтэнд урин суулгадаг учраас “лифтчин Болдоо” гэж нэрлэх нь бий.
“Яг түүн шиг-2” шоуны анхны дугаарын ялагчаар жүжигчин Т.Бархүү тодорсон юм. Тэрбээр СТА, дуучин Т.Дэлгэрмөрөнгийн дүрд хувирч, “Наян булаг” дууг нь дуулсан юм.
Д.ЦЭЭНЭ
