“Мөнх хааны зарлиг” хэмээх түүхэн адал явдалт шинэ уран сайхны кино мэндлэх нь ээ. Энэхүү уран сайхны киног 1256 оны Монголын эзэнт гүрний алс баруун хязгаарт болсон бодит түүхээс сэдэвлэн бүтээх аж. Тодруулбал монголчууд “Ассасин” хэмээх 170 жилийн туршид алан хядах ажиллагаагаараа алдаршсан лалын шашинтны бүлгэмийг дараад зогсохгүй “Уулын өвгөн” хэмээн өргөмжлөгдсөн ассасины толгойлогчийг олзолж авсан талаар өгүүлэх гэнэ.
“Ассасин” гэдэг нь хөлсний алуурчид буюу бусдын өмнөөс амийг хороох даалгавар гүйцэтгэгч нар бүх цагийн үед байсаар ирсэн. Даалгавар гүйцэтгэсэн ассасин нь дараа нь зугтаж амиа аврах огтхон ч бодолгүйгээр анхнаасаа үүнд амиа золиосолдог байна. Түүхэн сэдэвт адал явдалт уран сайхны киног “Look films” продакшны хамт уран бүтээлчдийн бүтээх гэж байна. Одоогоор түүхэн уран сайхны киноны зохиол бэлэн болсон бөгөөд дүрийн шалгаруулалт хийж байгаа ажээ.
Ассасинуудын гарт зөвхөн лалын ертөнцийн шах, ихэс дээдсүүд өртөж байсангүй. Мөн Баварын герцог 1-р Людвик, Иерусалимын захирагч Конрад Монферрадский зэрэг цуутай язгууртнууд өртөж амиа алдаж байжээ. “Уулын өвгөд”-ийн заналхийлэлд Хорезмын шах, Ромын пап, тэр ч байтугай Чингис хааныг хүртэл сүрдүүлэх гэж оролдож байсан тухай түүхэн эх сурвалжуудад дурдсан байдаг аж.
А.СҮРЭН
