Монгол улсын Морин хуурын чуулга дэлхийд алдартай концертын танхим бүрт уригдан тоглогдсон тоглолтыг Монголд анх удаа “Их Багшийн аялгуу морин хуураар” нэртэйгээр өчигдөр Корпорейт Конвэйшн центрийн концертын танхимд тавив. Энэхүү тоглолт нь Дэлхийн оюун санааны их хөтөч, хүмүүнлэг үйлстэн, урлаг соёлын зүтгэлтэн Төгс Гэгээрсэн Их Багш Чин Хайн дэлхийд мэндэлсэн өдрийг тохиолдуулан болсон юм.Монголд анх удаа Морин хуурын чуулга Их Багшийн зохиосон дуунаас дээжлэн Морин хуурын чуулгын Уран сайхны удирдаач, МУСТА Д.Түвшинсайханы найруулгаар Монгол хөгжмийн зэмсэг, морин хуурын аялгуугаар эгшиглүүлэв.
Их Багш Чин хайн зохиосон дуу, яруу найраг нь дэлхийд алдартай Тонни болон Эммийн шагналт хөгжмийн зохиолчдын талархлыг хүлээж, дэлхийн хөгжмийн ертөнцөд хүндтэй байр суурийг эзэлдэг байна.Их Багш Чин Хайн өмнөд Хятадын нутгаар аялан явахдаа тэнгисийн эрэгт босгосон Бурхан багшийн асар том хөшөөг хараад зохиосон гэх “Чулуун Буддатай хөөрөлдөхүй” дууны шүлгийг судлаач, орчуулагч Д.Гүн-Үйлс монгол хэлнээ хөрвүүлж дуучин Т.Дэлгэрмөрөн үзэгчдийн сонорыг мялааж, тоглолтыг нээлээ.
Үргэлжлүүлэн “Өнө мөнхөд та нарыгаа хайрлана”, “Далай их хайр”, “Үдшийн зүүд”, "Үрсээ бүүвэйлэх эхийн дуу" гэх мэт уянгалаг аялгуунууд хуурын татлагатай ижилсэж, танхим дүүрэн үзэгчдийн таашаалд нийцсэнийг алга ташилтын нижигнээнээс мэдэрч болохоор байв.
Удирдаач МУСТА Д.Түвшинсайхан хэлэхдээ: “Хөгжмийн бүтээл гэхээс илүү дууны гол утга санааг илэрхийлэхийг зорисон. Хайр гэдэг өөрөө олон зүйлээс салбарладаг. Үүнийг гаргаж харуулахыг хичээсэн. Даяаршиж буй ертөнцөд хөгжмийн хэллэг, ритм олон талд өргөн шилжих боломжтой болсон. Үүнийг ашиглахыг хичээлээ. Цаашид том хэмжээний бүтэн драммчилсан бүтээл болгох бодолтой байна” хэмээн онцоллоо.
Тоглолтод СТА Д.Бямбасүрэн, СТА дуучин Дэлгэрмөрөн, СТА Б.Баярцэцэг, залуу дуучин Номинжин, залуу дуучин Э.Соёмбо нар оролцлоо. Мөн Монгол улсын соёлын тэргүүний ажилтан дуучин Б.Баярцэцэг: “Дуугаа дуулж эхлэхэд танхим дүүрэн хүмүүс бүгдээрээ эерэг цэнэгээр дүүрчихсэн, хүн болгон хайраар бие биенээ адислаж байгаа мэт сэтгэгдэл төрж байсан. Халуун хайран дунд дуугаа дууллаа. Миний хувьд “On the river bank”дууг дуулахын тулд маш их хичээж бэлтгэлээ” гэв. Дахин давтагдашгүй, үнэхээр гайхамшигтай болж тоглолт болж чадлаа. Мөн Морин хуурын чуулга Их Багшийн аялгууг монгол хөгжмөөр буулгасан нь монгол хүний сэтгэлд хүрч чадсан гэж бодож байна” хэмээсэн юм.
Их багшийн зохиосон дуу, хөгжмийн зохиолоос бүтсэн мюзиклүүдийг Оскарын болон Эммийн таван удаагийн шагналт БиллКонти, Оскарын хошой шагналт Аль Каша, Тони болон Эммийн шагналт Дон Пиппин, Оскар, Грэммийн хошой шагналт Дэвид Шайр зэрэг алдартнууд найруулан Холливуд болон Бродвэйн тайзнаа дараалан амжилттай тоглож дэлхий нийтийн хүртээл болгосон байдаг. Харин Монгол улсад Их багшийн “Аниргүйхэн нулимсыг хайрлахуй ”мюзикл 2015 онд, “Жинхэнэ хайр” мюзикл 2017 оны 04 дүгээр сарын 22 ны өдөр Төрийн ордны их танхимын дэлгэцнээ тус тус гарч Монголчуудын хүртээл болсон билээ.
Түүнчлэн энэ үдэш Их Багшийн уран зураг, ном, дэнлүүний үзэсгэлэн дэлгэгдэж үзэгчдийн оюун санаа, мэлмийг баясгалаа.
