Германы жүжигчин эмэгтэй Ренате Лангер 1972 онд 15 настай байхдаа нэрт кино найруулагч Роман Поланскид хүчиндүүлсэнээ зарлаж, Швейцарийн шүүхэд хандлаа. Роман Поланскид өсвөр насандаа хүчиндүүлсэн гэх мэдэгдэл хийж, шүүхэд хандсан дөрөв дэх жүжигчин нь Лангер болж байна.
Яагаад ийм олон жилийн дараагаар хэргийг илчилж буйгаа Ренате Лангер тайлбарлахдаа "Ээж минь бие муутай хүн байлаа. Тиймээс би ээждээ энэ талаар дуулгаж зүрхийг өвтгөхгүй гэсэн юм. Мөн ээжтэйгээ энэ талаар ярихад надад ичгэвтэр их хэцүү байх байсан" гэжээ.
Рената Лангер
Дунд сургуулийн ахлах ангид сурч байхдаа Ренате Лангер найруулагч Роман Поланскитай Мюнхений нэгэн загварын агентлагт танилцжээ. Полански түүнийг кинонд тоглуулах тухай ярихаар Швейцарийн Гштаад дахь гэртээ урьсан байна. Гэвч хэрэг дээрээ хүчиндсэн ажээ. Маргааш нь Ренате Лангер Гштаадаас явсан ч ичиж, айсандаа болоод энэ талаар эцэг эхдээ хэлэлгүй өнгөрсөн гэнэ.
Ренате Лангер
Энэ олон жилүүдэд түүний нууцыг ганц найз залуу нь мэдэж байжээ. Хэрэг явдлаас хойш сарын дараагаар Роман Полански утасдаж, Марчелло Мастроянигийн хамт нэгэн кинонд тоглох эсэхийг Ренатегаас асуусан байна. "Зөвхөн мэргэжлийн үүднээс хандана гэвэл тоглоно" гэж Ренате хариулснаар Ромд очиж, тус кинонд туслах дүр бүтээжээ.
Гэвч хожим Ромд ажлаар очиход нь Роман Полански дахин хүчиндсэн гэнэ. "Тэр явдал насан туршид минь хар толбо үлдээсэн" гэж Ренате Лангер өгүүлсэн байна.
Роман Полански
Дээр өгүүлсэнчлэн Роман Полански өсвөр насны охидыг хүчиндсэн тухай олны чихэнд хүрч буй дөрөв дэх хэрэг нь энэ.
Франц-польш гаралтай кино найруулагч Роман Поланскиг 1977 онд 13 настай Саманта Геймерийг хүчиндсэн хэрэгт буруутгасан юм. Гэвч тухайн үед Полански АНУ-аас оргон зайлсан тул одоо хүртэл хэргийг хаагаагүй байгаа билээ. Үүнээс гадна өнгөрсөн зун Робин М хэмээх эмэгтэй 1973 онд 16 настай байхдаа мөн Поланскид хүчиндүүлснээ мэдэгдсэн. Мөн Их Британийн жүжигчин Шарлотта Льюис 16 настайдаа Поланскид хүчиндүүлсэн тухайгаа мэдэгдэж, шүүхэд хандсан юм.
Саманта Геймер
Одоогоор 83 настай Роман Полански Парист амьдарч буй ажээ. Швейцарь, Польшид тэрбээр өмнө нь амьдарч байсан бөгөөд тус улсын Хууль зүйн яамнаас Поланскиг АНУ руу хэрэгтний хувиар шилжүүлэхээс татгалзсаар өдийг хүрсэн юм.
М.Болджин
