Өнөө жилийн “Алтан бөмбөрцөг” наадмын улаан хивсний ёслол урьд өмнөх наадмуудаас огт өөр байлаа. Алтлаг, мөнгөлөг, гялалзсан, саатай, хурц тод гээд нүд гялбам солонгорсон гоёл тэнд огт байсангүй.
Мерил Стрипээс эхлээд Анжелина Жоли, Николь Кидмэн, Эва Лонгория гээд Холливудын сайхан бүсгүйчүүд бараг бүгд шахам хар гоёлтой ирэв. Эмэгтэйчүүдийн бэлгийн хүчирхийлэл, бэлгийн дарамт, жендерийн эрх тэгш байдал, арьс өнгөөр ялгаварлах үзлийн эсрэг Time сэтгүүлийн “Up” санаачилгыг дэмжиж тэд ийнхүү хар өнгөөр ижилссэн юм. Кино урлагийн салбарын эрчүүд ч мөн тэдэнтэй нэгдэж, гялтганасан хар хослолтой ирсэн байв.
Харин Холливудынхны чимээгүй эсэргүүцэлд нэгдээгүй гурван хатагтай бий.
БАРБАРА МЕЙЕР
Өдгөө 31 настай модель бүсгүй “Алтан бөмбөрцөг”-ийн улаан хивсний ёслолын хамгийн өнгөлөг нэгэн нь байв. Саарал, цэнхэр, цагаан, ягаан өнгө сүлэлдсэн түүний даашинз хар даашинзтангуудын дэргэд дэндүү содон харагджээ. Тэрбээр Австрийн хөрөнгө оруулагч Клеменс Халлманны хамт ёслолд хүрэлцэн ирсэн байна.
БЛАНКА БЛАНКО
Жүжигчин бүсгүй гал улаан, хэт задгай загвартай даашинзтай иржээ. Хар өнгөтэй биш ч гэсэн тэрбээр зориуд арьсныхаа өнгийг ил харагдахуйц, бас биеийнхээ далд хэсгүүдийг хаагаагүй загвар сонгосон гэнэ. Энэ маягаар эсэргүүцлээ илэрхийлэхийг хүсчээ.
МЕХЕР ТАТНА
Хар өнгөнөөс татгалзсан хамгийн “гайхмаар” хатагтай бол Мехер Татна. “Алтан бөмбөрцөг” кино наадмыг зохион байгуулагч Холливудын Олон улсын хэвлэл мэдээллийн холбооны ерөнхийлөгчөөр ажилладаг түүнийг Холливуд дэх буруу хандлагыг өөрчлөх гэсэн санаачилгыг эсэргүүцэж буй хэмээж байна. Харин энэтхэгчүүд улаан өнгийг ихэд ач холбогдолтой өнгө гэж үздэг тул Татна зориуд улаан өнгө сонгосон гэх хүмүүс ч байна.
С.ЦЭЛМЭГ
