Москва хотын Засгийн газар, ОХУ-ын Соёлын яамны дэмжлэгээр Гнесины нэрэмжит Оросын хөгжмийн Академийн концертын их танхимд зохион байгуулагдсан Оросын нэрт хөгжмийн зохиолч С.В.Рахманиновын нэрэмжит залуу төгөлдөр хуурчдын олон улсын анхдугаар уралдаанд АНУ, ИБУИНВУ, Сингапур, Монгол, БНХАУ, Болгар, БНСУ зэрэг 10 гаруй улс, Оросын өнцөг булан бүрээс ирсэн нийт 250 гаруй залуу төгөлдөр хуурчид оролцсон бөгөөд тус уралдааны гуравдугаар байрыг эзэлсэн Хөгжим бүжгийн коллежийн гуравдугаар ангийн сурагч О.Нандин, тусгай байрын эзэн З.Амин-Эрдэнэ нарын шагналыг өчигдөр Соёл урлагийн газрын дарга Эрдэнэбат гардууллаа.
Тус хамтлагийн хамгийн бяцхан төгөлдөр хуурч нь Монгол Улсаас оролцсон зургаан настай З.Амин-Эрдэнэ байсан юм. Тэрбээр зургаан нас хүрээд хоёрхон сар болж байгаа юм байна. Түүнийг насандаа баймгүй бахдам амжилт гаргасныг Оросын хэвлэлүүд онцлон мэдээлсээр байна. Тэд “Багш маань биднийг энэ зүгээр л концерт. Юу чаддагаа л харуул гэж хэлсэн. Бид багштайгаа зөндөө их бэлдсэн зүйлээ л харуулсан. Маш баяртай байна” хэмээн сэтгэгдлээ хуваалцсан бол тэдний багш С.Саянцэцэг ийн сэтгэгдлээ хуваалцсан юм.
“Миний хүүхдүүд хэзээ ч надаар хүчлүүлдэггүй. Өөрсдөө маш их хичээл зүтгэлтэй бэлтгэл сургуулилалтаа хийдэг. Хүүхдүүдэд концерт гэж хэлсний тухайд би тэднийгээ уралдаанд оролцож байна хэмээн сандаргахыг хүсээгүй. Зүгээр л тайван юу сурснаа л харуул гэж хэлсэн. Сэтгэлзүйг нь бэлтгэж байна гэсэн үг шүү дээ. Тэд чадсан. Хүүхдүүд аль болох олон удаа тайзан дээр гарснаар нүүр хагардаг, айдас, сандралаа мартдаг. Тиймээс хүүхдүүдээ тайзан дээр аль болох олон удаа гаргахыг хүсдэг. Цаашид ч олон олон тайзан дээр гаргана гэж бодож байгаа” гэлээ.
С.Болорчимэг
