БСШУСЯ болон Соёл, урлагийн газрын зүгээс ивээн тэтгэгч, хамтран зохион байгуулагчаар ажиллаж байгаа “Алтан хальс” холбооны “Алтан хальс индепендент кино наадам” (Altan Khalis Independent Film Festival – AKIFF) 06 сарын 2 – 8-ны өдрүүдэд “iCinema” кино театрт зохион байгуулагдаж байна.
Энэ удаагийн AKIFF кино наадам Хүүрнэлт кино, Хүүхэлдэйн кино, Баримтат кино, Эксперименталь кино гэсэн төрлөөр зохиогдож байна. Энэ жил гадаадын 55 орны 487, Монголын 27 бүтээл ирсэн нь өнгөрсөн оныхтой харьцуулахад өндөр тоо юм. Өнгөрсөн жил 52 орны 268 бүтээл ирж, уралдаант хэсэгт 25 бүтээл хэн нь шилдэг болохоо мэдэхээр өрсөлдөж байсан билээ. Энэ жил уралдаант хэсэгт өрсөлдөхөөр шалгарсан 31 бүтээл тодорсон бөгөөд эндээс 17 нь Монгол кино байна.
Энэ жил гадаадын алдартай найруулагч, уран бүтээлчдийг кино наадамдаа урьж оролцуулан, мастер класс хийж байгаа нь тун үр өгөөжтэй байна.
6/6-нд Онцлог авангард бүтээл, Унгарын найруулагч Дёрдь Пальфигийн ‘’Зогьсуулалт’’ (2002),
6/7-нд Дэлгэцийн сонгодог, Найруулагч Н.Уранчимэгийн ‘’Аргамжаа’’ (1992)
6/8-нд Хаалтын үзвэр: “Nguyen-ийг хэрхэн дуудах вэ?” буюу Кэрол Уэний урын сангаас толилуулах болно.
Мөн наадмын гол утга учир болсон уралдаант хэсэгт шалгарсан кинонуудыг та бүхэн хүрэлцэн ирж үзэх боломжтой. Шилдэг богино хэмжээний кино шалгаруулах шүүлтийг Соёл урлагийн газрын дэлгэц, медиа урлагийн бодлогын хэрэгжилт хариуцсан мэргэжилтэн (PhD) Д.Цэнгэл, Бусаны олон улсын кино наадмын ази кино урлагийн хөтөлбөр боловсруулагч Ким Ён-ү, Брисбейний олон улсын кино наадмын захирал Максин Уильямсон, “Алтан хальс” холбооны тэргүүн, найруулагч С.Бямба, Кэмбрижийн олон улсын оюутны Уотерспрайт кино наадмын продюсер, IEFTA холбооны "Global Film Expression" кино хөтөлбөрийн захирал Бернадетт Шрамм нар явуулж, шидэг бүтээлүүдийг зарлана.
Мөн энэ жил олон сонирхолтой зочид хүрэлцэн ирнэ. Германы найруулагч Юлиан Радлмайер, Олон улсын өсөж буй авъяаслаг кино уран бүтээлчдийн холбоо (IEFTA)-ны Дэлхийн кино илэрхийлэл хөтөлбөрийн захирал Бернадетт Шрамм, Бусаны олон улсын кино наадмын ази кино урлагийн хөтөлбөр боловсруулагч Ким Ён-ү, Бүтээлүүд нь 100 гаруй кино наадамд шалгарч байсан найруулагч Кэрол Уэн, Брисбений олон улсын кино наадмын захирал Максин Уильямсон, наадмаар гарах Кувейт киног бидэнд үзэх боломж олгож буй Кувейтийн соёлын яамны зочид, шинэ залуу найруулагчид гэх мэтчилэн олон хүн энэ наадамд оролцож байна.
Мөн бүх мастер классууд үнэ төлбөргүй явагдах тул та бүхэн авьяаслаг, чадварлаг, туршлагатай хүмүүсийн тусгай хичээл, хэлэлцүүлгийг сонсож, суралцах боломжтой юм.
Бүтэн долоо хоногийг кино урлагаар амьсгалж, шилдэг шинэ бүтээлүүдтэй танилцан өнгөрөөх боломжийг “Алтан Хальс Индепендент Кино Наадам” та бүхэнд олгож байна.
Дэлгэрэнгүй мэдээ, мэдээллийг “Altan Khalis Independent Film Festival” пэйж хуудаснаас хүлээн авна уу. Холбогдох утас: 95154422
