Монгол Улсын Боловсрол, Соёл, Шинжлэх ухаан, Спортын сайд, Нийслэлийн Засаг дарга бөгөөд Улаанбаатар хотын захирагчийн 2018 оны 04 дүгээр сарын 26-ны А/226 дугаар хамтарсан тушаалаар, Монгол туургатаны соёл, урлагийн их наадам энэ сарын 6-8-ны өдрүүдэд Улаанбаатар хотноо зохион байгуулагдах гэж байгаа билээ.
Монгол туургатаны улс, орнуудаас үндэсний болон орчин үеийн урлагийн уран бүтээлчид, үндэсний үйлдвэрлэгчид, гар урлаачид, эрдэмтэн докторууд хуран чуулж байгаа тус наадмын хүрээнд, “Үл Тасарна” хэмээн нэрийдсэн Монголын Их Хаадын уран бичвэр, зургийн үзэсгэлэн энэ сарын 6-8-ны өдрүүдэд 10:00-16:00 цагийн хооронд Монгол төрийн ордонд байрлах, Төрийн түүхийн музейд дэлгэгдэнэ.
Монгол туургатаны соёл, урлагийн их наадамд оролцогчид зочид, төлөөлөгчид болон нийслэлийн ард иргэдэд зориулан дэлгэж буй тус үзэсгэлэнг, Үндэсний уран бичвэрийн холбооноос санаачлан сүүлийн хоёр жил орчмын хугацаанд, Нийслэлийн Засаг даргын Тамгын газрын дэмжлэгтэйгээр, Нийслэлийн соёл, урлагийн газартай хамтран бүтээжээ.
