Монгол улсын СУИС болон Тайванийн Соёлын хамтын ажиллагааны нийгэмлэг есдүгээр сарын 18-21-ны өдрүүдэд “Тайваний баримтат киноны наадам”-ыг хамтран зохион байгуулахын сацуу “Түүхэн он цагийг түүчээлсэн баримтат киноны уран бүтээлчид” нэртэй уулзалт семинарыг амжилттай зохион байгуулж, мэргэжил нэгтнүүд харилцан туршлага солилцож, хамтран ажиллах талаар санал солилцлоо.
Тайванийн Соёлын хамтын ажиллагааны нийгэмлэгийн Ерөнхий нарийн бичгийн дарга Чэн Ши Хун “Тайвань Монгол хоёрын туулсан түүхэн он цаг болон ардчилсан хувьсгалыг өрнүүлж байсан зэргээр ижил төстэй юм. Энэ удаагийн баримтат кино өдөрлөгт Тайванийн ардчилсан хувьсгалын өрнөл, олон талт соёл, байгаль экологийн тэнцвэрт байдал зэрэг сэдвийн хүрээнд бүтээлээ авчирч Монгол үзэгчидтэй хуваалцаж мөн хоёр талын кино уран бүтээлчдийн цаашдын хамтын ажиллах гарц, боломжийг эрэлхийлж буйгаа” илэрхийллээ.
Монголын кино судлаач Б.Түмэн-Өлзий хэлсэн үгэндээ “Ойрын жилүүдэд Монгол улсын кино олон улсын шинжтэй кино наадмуудад оролцож, Монголын түүх, уламжлалт угсаатны соёлын талаарх сэдэв илүү их олны талархлыг хүлээж байна. Баримтат киноны хувьд цаашид хөгжих орон зай өргөн байгаа бөгөөд Тайвань, Монголын баримтат киноны уран бүтээлчид хамтран ажиллана гэж найдаж байна” гэсэн юм.
Монгол улсын нэрт баримтат кино найруулагч Д.Хишигт “Түүхэн шалтгаанаас үүдээд Тайванийн холбогдох газруудад Монголын түүх, соёлтой холбоо бүхий баримт, судалгааны материалууд тэр дундаа Чингис хааны эш хөрөг, Монголын нууц товчооны хятад эх хадгалагдаж байдаг ба энэ сэдвээр баримтат кино хийвэл илүү олон хүн Монгол улсын агуу их түүхийг ойлгох болно” гэв.
СУИС урьд нь Польш, Япон, Турк зэрэг орны кино өдрүүд зохион байгуулж байсан туршлагатай бөгөөд энэ удаа Тайванийн баримтат кино өдрүүдийг зохион байгуулж “Яагаад бухимдахгүй байна вэ? /Зэрлэг сараана цэцэгсийн хөдөлгөөн/”, “Хайрт Тайвань минь”, “Үүнээс хойш“, “Хар баавгайн ой” “Нис, Цаасан шувуу минь нис“, “Зөв зүйл“, “Би яамгүйгээр амьдарч чадахгүй“ зэрэг нийт долоон баримтат киног Монголын үзэгчдийн хүртээл болголоо.
Семинарт Тайванийн талаас найруулагч Ван Жы Чэн, Тайваниийн эмэгтэй кино бүтээгчдийн нийгэмлэгийн зөвлөх Чэнь Ли Гуй найруулагч, Ши Шинь их сургуулийн дэд профессор Ли Сянь Сиу найруулагч нар Монгол талаас мөн цөөнгүй найруулагч судлаач, багш нар оролцсон юм.
А.ТУЛГА
